SO SINDAW KO KAOYAGOYAG O MUSLIM

♥-----------------*------♥-----*--------------------♥

So Muslim na isa a tantoniyan a mapanganganay na andamanaya i kasindawi sii ko KAOYAGOYAGIYAN ! a giyanan so Sindaw a sii makambbkn sii ko Puso na go sii ko pamikiran na go sii ko kailay, na mipagawa iyan so kikokolambo o malibotng sii ko Puso iyan na go sii ko pamikiraniyan na go sii ko Mataniyan !

Sabap san na So Nabitano a Muhammad s.a.w. na inindao niyan rktano so mga Galbk a khabaloyniyan so kaoyagoyag tano a SINADAW!

Phitharo o Rasulollah s.a.w. :

( وَالصَّلاَةُ نُورٌ ) ( وَالصَّبْرُ ضِيَاءٌ ) Muslim.

Maana : Go so Sambayang na Sindaw. Go so Kasabar na Sinar.

> Aya maana anan pagariko nago babayakn na o kabayaaka a kasindawan so kaoyagoyag ka na tatapangka so sambayang nago so kasabar.

Go o kabayaaka sii ko Walayngka so KASINDAWAN na lalayon kawn phthindgn so mga SAMBAYANG a Sunnah.

Go o kabayaaka sii ko trak ka odi na Service ka a katagoan sa Sindaw na lalayongkawn dii kazambayang sa mga Sunnah.

Sabnar a so Sambayang na ron phrnk so mukarna o Muslim.

Note :

Aya a kailangan na basta a Makatindg ka sii ko phzambayangan ka na pokasangkadn sa ginawangka so dii kapamimikirana ko mga langowan parahiyasan ko DONIYA! na sampornaangka so niat ka na babaan ka so ginawangka, ka mataan a ayadn a aadapn ka sangkoto a masa na DATU o langowan o mga DATU, a giyoto skaniyan so phpham-gay sa sindaw na go phapaar ko langowantaman.

- ِAyapn a Pinaka mala a bolong a phakasindaw sii ko puso a kalilibngan na so QUR-AN :

Phitharo o Allah :

( يَاأَيُّهَا النَّاسُ قَدْ جَاءتْكُمْ مَوْعِظَةٌ مِنْ رَبِّكُمْ وَشِفَاءٌ لِمَا فِي الصُّدُورِ وَهُدًى وَرَحْمَةٌ لِلْمُؤْمِنِينَ ) Yunus 57.

Maana :

Hay! skano a mga Taw, na sabnar a miyaka talingoma rkano so pangoyat a phoon sii ko kadnaniyo a go Bolong sii ko - nganin a sakit - a madadalm sii ko mga Puso, na go toroan na go limo ko mga taw a miyamaratiyaya.

Aya mapipikir sangkanan a Bolong na go toroan na go limo na so QUR-AN AL CAREEM.

---------