( SO KOKOMAN O KAPAKINDOLONA KO MGA KA-FIR )

( SO KOKOMAN O KAPAKINDOLONA KO MGA KA-FIR )

=========================================

GIYANGKAI A BANDINGAN NA DOWA A KHAOSAYRON :

1- SII KO BITIYARA PANTAG KO PHMBTHOWAN SA "AL-WALA WAL BARA" A PD ANAN SII KO MGA IMPORTANITIDN A KATAWIRON O MUSLIM SABAP KO PD ANAN SII KO AQEEDA ODI NA PANARIMA A DI KHAPAKAY OBAON IGNORANTI SO MUSLIM.

2- SO KHAPAKAY RON SO KINDOLONAAN SII KO KA-FIR KA KNABA MAKASOSOLD SII KO BITIYARA SA "AL-WALA WAL BARA".

PAGANAYRON NA ANTONAA I PHMBTHOWAN SA "AL-WALA WAL BARA" ?

-  AL-WALA" : NA BASA ARAB ANAN A AYA LITTERAL A MAANA NIYAN NA SO " BABAYA NA GO KATABANG" GO "KARANI". ( KAPAKINDOKAPILA ).

NA SII KO MANGA ULAMA SA AQEEDAH NA AYA INIPMAANA IRAN KO "AL-WALA" NA ; SO KABABAYAI KO MGA MU-MEN SA MISABAP KO PARATIYAYA IRAN SII KO ALLAH, GO SO KATABANGI KIRAN , GO SO KAPHMBGI KIRAN SA NASI-HA, GO SO KAOGOPI KIRAN, GO SO SALAKAW SAN A KABNAR O MUM-MEN KO PAGARINIYAN A MU-MEN. ( IGIRA MAMBO A SO MUSLIM NA KNABA DIINDOSA SA MALA A DUSA A SASABOTN IYAN OTO A MALA A DUSA KO ALLAH ).

AMAYPMAN KA SO MUSLIM NA BARA DUSA APIYAPN KATAWANIYAN A DI KHAPAKAY SO DINIYAN DIINGGALBKN KA MALAOTO A DUSA SII KO ALLAH NA SO KABNARIYAN SII KO "AL-WALA" NA SII DEPENDI SII KO KALA  O PARATIYAYANIYAN SII KO ALLAH.

AYA PAKA ASAL NA SO MUSLIM A BARA DUSA NA IPHTHOLAK SKANIYAN KA ANIYAN MAGDAM A MARATA SO DINIYAN DIING GALBKN, NA GIYOTODN I BAGIANIYAN SII O "AL-WALA" KA GIYANAN I TOOS SA BABAYAON O PAGARINIYAN A MUSLIM KA AN DI KHATATAP KO KAMBARADUSA.

MIYANGGOLA OLA ANAN KO MASA O RASOLOLLAH S.A.W. KO KINITOLAKNIYAN KO 3 A MGA SAHA-BA A DA ONOT SA KATHIDAWA KO KIYATIDAWA SA TABOK, NA TAMAN SA DA MITORON SO AYAT A RINILAAN SIRAN O ALLAH NA DASIRAN MBITIYARAIN O MGA TAW AYA MALA NA SO RASOLOLLAH S.A.W. KA GIYOTO I MAS MAPIYA KIRAN KA ANIRAN MAGDAM A TANTO A MARATA SO SIYOWA IRAN.

OPMAN OBA AYA MASLAHA NA DISIRAN ITHOLAK KA BADN KHAOMANI SO AWIDA AKAL NA SIITO DEPENDI KO KAIILAYAON O SOMASABOT A MAGA AGAMA SA AYA MAMBO SHARAT OTO A DIRON KHITHOLAKN NA DINIYAN DII KAPANGOSIYATAN SO BARADUSA BALABAWRON O TONGANAYNIYAN. GIYANAN I MIYA ALOY O MGA ULAMA A MGA SALAF.

-  SOPMAN SO DIING GALBK SA MGA BID-AH SII KO ISLAM NA AYA MAMBO A KHAILAY NA AY KALA O DINIYAN DIINGGALBKN A BID-AH ? INO IKHAKAFIR OTO ANTAWAA KA DI ? NA OPAMA KO IKHAKAFIR NA SAMAWTO NA KNABA OTO MUSLIM NA SO KANDOLONA SA KA-FIR NA AYAON KINDOLONAAN.

NA OPMAN O DI PHAKAKAFIR SO BID-AH NIYAN OGAID NA DINIYAN OTO DII IPANOLON SII KO MGA TAW NA KAILANGAN SO KITOLAKNON KA GIYOTO I BAGIANIYAN KO "AL-WALA", O KHAPARO NA DI IPHMBITIYARAI GO DI IPHNDOLONA TAMAN SA DINIYAN AWAAN SO BID-AH NIYAN, GIYANAN NA IJMA ANAN KO MGA ULAMA O MGA SALAF.

OGAID NA OPMAN O AYA MASLAHA NA MAS THOMO A MIMBITIYARAI KA PARA KAPANGOSIYATAN O TAW A SOMASABOT KO BNAR NA KHAPAKAY OTO A TIG I SHAIKH SA-LIH AL-UTHAIMEN R.T. SA PARABO OTO SII KO MAS MALA A KAMAPIYAAN A MAOONA SA PAMIKIRAN.

NA O SALAMAKA O TAW A DII NGGALBK SA BID-AH NA KHAPAKAY A PAKAKASOWIN KAWN SO SALAMAIYAN. NA AYABADN A SUNNAH NA DISKANIYAN ZALAMN GO DI ZMBAGN SO SALAMIYAN OPAMA KA GIYOTO I MAS MALA I RARAD KO KAMAPIYAANIYAN, KA AN KATOKAWI O MGA TAW SO KARATA O GALBK IYAN A BID-AH.

NA SOPMAN SESECRETOON IYAN SO BID-AH NIYAN KA KNABANIYAN IPHPHANGAYAG SA TAW NA KHAPAKAY A DII IPAGONTODA GO DI SKANIYAN ITHOLAK.

SOPMAN SO " AL-BARA" : NA AYA MAANANIYAN SA LITTERAL NA SO "KIPAKAWATANN KO SHAY" GO " KIPAGAWAAN KO SHAY". ( KAPANGANGIYAS ).

NA SIIPMAN KO MGA ULAM SA AQEEDAH NA : SKANIYAN SO KARARANGITI SII KO MGA RIDOAY O ALLAH A MGA MUNA-FIQ GO SO KADANDAN O MGA KA-FIR, GO SO KARIDOA KIRAN, GO SO KAPAKAWATAN KIRAN, GO SO KAPAKIPHRANG  KO MGA "HARBEYOON KIRAN" SA DEPENDI KO KAADN O BAGR SII KO MGA MUSLIM.

SO MGA DALIL SANGKANAN A PHMBTHOWAN SA " AL-WALA WAL-BARA" NA TANTO A MADAKL SII KO QUR-AN AGO SII KO SUNNAH O RASOLOLLAH S.A.W. NA MALOY TANORON SA APIYA ZASATIMAMBO :

PHITHARO O ALLAH PANTAG KO AL-WALA :

(وَالْمُؤْمِنُونَ وَالْمُؤْمِناتُ بَعْضُهُمْ أَوْلِياءُ بَعْضٍ ) TAWBA 71.

MAANA : SO MGA MU-MEN A MGA DATU GO MGA BAE NA SO BAAD KIRAN NA DOKAPILA O SABAGI.

PHITHAROIYAN PANTAG KO AL-BARA :

(قَدْ كَانَتْ لَكُمْ أُسْوَةٌ حَسَنَةٌ فِي إِبْرَاهِيمَ وَالَّذِينَ مَعَهُ إِذْ قَالُوا لِقَوْمِهِمْ إِنَّا بُرَآءُ مِنْكُمْ وَمِمَّا تَعْبُدُونَ مِنْ دُونِ اللَّهِ كَفَرْنَا بِكُمْ وَبَدَا بَيْنَنَا وَبَيْنَكُمُ الْعَدَاوَةُ وَالْبَغْضَاءُ أَبَدًا حَتَّى تُؤْمِنُوا بِاللَّهِ وَحْدَهُ ) AL-MOMTAHINAH 4.

MAANA : SABNAR A MIYABALOY RKANO A SONGKADN A MAPIYA SO IBRAHIM A GO SO MA PDIYAN GOWANI A THAROON IRAN KO PAGTAW IRAN –A MGA MUSH-RIK- A MATAAN A SKAMI NA ANGIYAS KAMI RKANO GO SII KO NGANIN A PHZIMBAANIYO A SALAKAW KO ALLAH, INONGKIR AMI SKANODN NA GO MIYAPAYAG SII KO PAGLTAN TANO SO RIDO A GO SO RARANGIT DAYON SA DAYON  TAMAN SA DINYO PARATIYAYAAN SO ALLAH SA SKANIYAMBO.

PITHARO O RASOLOLLAH S.A.W. :

  أوثق عرى الإيمان الحب في الله والبغض في الله ) ) ABU DA-WD.

MAANA : AYA PINAKA MABAGR A PHKHASINOWAN KO PARATIYAYA NA SO BABAYA PANTAG SII KO ALLAH GO SO RARANGIT PARABO SII KO ALLAH.

IMANTO NA AYA PHAKARAYAGN TANO NA ANTONAA I PHMBTHOWAN SA KANDOKAPILA " AL-WAL " A KHAPAKAY  SII KO ISLAM NA GO DI KHAPAKAY  SII KO ISLAM ( AL-WALA AL- MASHRO, WAL MUHARRAM ).

SO AL-WALA" A KHAPAKAY NA MADAKL A PKHAKILANGANON PDON ANGKAI A KHAALOY :

1.  SO KABABAYAI KO LANGON O MGA MU-MEN, SII KO APIYA ANTONAA MASA GO APIYA ANTONAA A DARPA GO APIYA ANTONAA I CLASSINIYAN A TAW A MUSLIM.

2. SO KATABANGI O MUSLIM KO PAGARINIYAN A MUSLIM IGIRA A MIYALALIM GO RINIDO SA BAPIYA ANDA A DARPA; PHNGGOLALAN SA LIMA ODI NA TAMOK ODI NA KATHARO ODI NA DAWAT.

3. SO KATABANGI KO PAGARI A MUSLIM SA SODN SO GINAWANIYAN GO TAMOK KO KATAGOIYAN SA KANGT.

4. SO KAGDAMA O MUSLIM KO MASAKIT A PHKHAGDAM O MGA PAGARINIYAN A MGA MUSLIM PHOON KO MISOSOGAT KIRAN A MGA RAGAOR ODI NA MURALA. GOSO MGA SALAKAW SAN.

NA SO AL-WALA" SII KO MUSLIM NA AND OTO A :

1-  FARDHO AYN : DATAR O KASMBAGA KO MIYAKAMBAAN A GOMINIRAW A ALHAMDULILLAH, SA YARHAMUKALLAH.

2- FARDHO KIFA-YA : DATAR O KASMBAGA KO SALAM, GO SO TAZHEEZ KO MIYATAY.

3- SUNNAH MUSTAHABBA : DATAR O KABNTAL SA PHKHASAKIT A MUSLIM.

SOPMAN SO DI PHANGA PAPAKAY  SO KAOSARA KO AL-WALA KA HARAM SKANIYAN ROO NA KATAYA SIRAN :

 - SO KAPAKINDOKAPILA KO MGA RIDOAY O ALLAH A MGA PHPHAMANIMBA SA BARAHALA GO SO MGA MUSHRIK GO SO MGA MUNA-FIQ NA PALAYA ANAN HARAM.

KATAYA SO RAYAGAN ANAN ; DOWA ANAN KACLASSI :

A -  KAPAKINDOKAPILA KO MGA KA-FIR A IKHAKAFIR SKANIYAN O MUSLIM :

1-  SO KABALING SII KO INGD A KA-FIR A AYAON MINILI NA SO MUSLIM KA BABAYAIYAN KO KIPAGPDAANIYAN KO MGA KA-FIR GO PHKHABABAYAANIYAN SO AGAMA IRAN, GO DINIYAN SIRAN DII MBABANTOBANTOGN NA GO PHZAWAANIYAN KIRAN SO MGA PAAWING O MGA MUSLIM, NA GIYAI NA IKHAMORTAD ANAN O TAW PHOON KO ISLAM.

2- SII KOMOWA SO MUSLIM SA CITISIN KO INGD A KA-FIR A PHNGGOBAT KO MGA MUSLIM SA SARTA A LANGONIYANDN PHPHANGONGONOTANAN SO IBABADA IRAN A KOKOMAN NA GO MGA ATORAN DATAR O KAZONDARO A PD KIRAN NA PHAGOGOP SKANIYANPN KO  KAPHPHANGASOLTA KO MGA MUSLIM GO SO SALAKAW SAN. ( GIYANAN NA IKHAKAFIR ANAN O MUSLIM KO KIYAOPAKATIRON KO MGA ULAMA O MGA MUSLIM ) INONTABO OBA INOROO MATATAGO KA DAA DARPA A MUSLIM A MAPAPARO RON A MAKA TRANSPERON KA SAMAWTO NA AYA KOKOMANIYAN NA MATTLG SKANIIYAN NA SO PUSO IYAN NA DIRONDN MAKAAYON.

3- SO KAPANANAYANI KO MGA KA-FIR SA TAROTOP ; DATAR O MGA GALBK IRAN, GO SO MGA KANDITAR IRAN, NA PHPHANANAYANAN SO MGA OLAWLAIRAN, GO KAKHAKASO KASOY KO MGA SIMBAHAN IRAN, GO KAPAMANGPD KIRAN KO MGA KAKHALAMI LAMI KO MGA ALA KIRAN A MGA GAWII. ( NA GIYANAN NA IKHAKAFIR ANAN O MUSLIM KO KIYAOPAKATIRON KO MGA ULAM ).

4- SO KAPANANAYANI KIRAN A MGA KA-FIR KO KATAWNDN A IPHAKALIYO SII KO ISLAM DATAR O KAPHZOLOTA O MUSLIM KO CROSS A DINIYAN DII TABBAROKAN – PAMANGNIYAN SA KAMAPIYAAN – A SKANIYAN NA KATAWNIYAN A TANDA OTO O MGA CRISTIAN A SIRAN I PHZOLOTON A GO DIRON DII THABARROK. NA IKHAKAFIR ANAN O MUSLIM.

5- SO DII KAPAMISITAA KO MGA SIMBAHAN IRAN A AYA PANARIMAON O MUSLIM NA IPHAKARANI OTO SII KO ALLAH. NA IKHAKAFIR PN ANAN O MUSLIM.

6-SO DII KIPANOLONN SA KAPAKAISA ISAISAA SII KO MGA AGAMA A PALAYADN PHAKAY SO LANGON O AGAMA . NA IKHAKAFIR PN ANAN O MUSLIM. KA AYABO DAPAT A AGAMA NA SO ISLAM A AGAMA O ALLAH DADN A SALAKAWRON.

7- SO KAOGOPI O MUSLIM KO MGA KA-FIR KO KAPHMBONOA KO MGA MUSLIM; NA DOWA ANAN I BONTAL :

-  SO KAOGOPIKIRAN O MUSLIM SA BABAYAIYAN KIRAN, NA GO BABAYAIYAN SA KALANGKOLOBAN O MGA KAFIR ANGKOTO A MGA MUSLIM. NA GIYANAN NA IKHAKAFIR ANAN  O MUSLIM.

- SO KAOGIPIKIRAN O MUSLIM SA APIYA ANTONAA OGOP SABAP BO KO PERSONAL INTEREST – KAMAPIYANIYAN A SARILI –  ODI KALKIYAN OBA MADA SO KAMAPIYAANIYAN ODI NA ADN A MAADN A RIDO KO PAGLTANIYAN  AGO SO PAGARINIYAN A MUSLM. NA GIYANAN NA KNABAANAN IKHAKAFIR O MUSLIM OGAID NA PD ANAN SII KO MIYAMAKALALA A DUSA SII KO ALLAH.

AYA DALIL A ANGKANAN SA SO MUSLIM NA DA ROO  MAKAFIR OGAID NA MIYADUSA SA TANTO A MALA A DUSA NA IJMA O MGA ULAMA, DATAR O KIYAALOYAON I AL-MAM AL-TAHA-WI.

NA AYA KAMBBKNAN ANGKANAN A IJMA; NA SO HADITH A MIYA ALOY PANTAG KI "HA-TIB IBN BALTAA R.A. GOWANI A MAN-GIYAN A SO RASOLOLLAH GO SO MGA SAHA-BA NA NGGOBATN IRAN A MAKKAH, NA MIZORAT SO HA-TIB IBN BALTAA A IMBGAYNIYAN KIRAN SA MAKKAH KA ANSIRAN MAKAIKTIYAR, INANGIN O DI SO RASOLOLLAH S.A.W. NA PAAGMAAN IYAN OTO KA PARA DI MAKAPHRIPARADO SO MGA KA-FIR SA MAKKAH, NA SO KIYATOONA KO SORAT O HA-TIB NA TANTO A KIYARARANGITAN SO MGA SAHA-BA KA ODI SO RASOLOLLAH S.A.W. NA ITANAIRANON OTO.

NA DASKANIYAN PAKAKAFIRA O RASOLOLLAH S.A.W. SABAP SA INIZAANIYAN O ANTONAI SABAP OTO NA MIYATHAROIYANON A KAGIYA SO MGA FAMILIYANIYAN NA ZISII SA MAKKAH, KNABA AYA SABAPIYAN NA BA AGAMA. NA SAMAWTO NA PERSONAL INTEREST OTO. NA DARON PAKA KAFIRN O RASOLOLLAH S.A.W.

OPMAN OBA INONIYAN KIYAOGOPAN SO MGA KA-FIR KA MATATAGOSKANIYAN SA KANGT NA MIYATGL SKANIYAN NA DIRON KHIKOKOM OBA MIYAKAFIR ODI NA MIYADOSA SA MALA A DUSA KA MIYATGL SKANIYAN A DINIYAN KABAYA.

 

SOPMAN SO KAPAKINDOKAPILA SII KO MGA KA-FIR A HARAM OGAID NA KNABA IKHAKAFIR O MUSLIM NA KATAYA SO RAYAGANIYAN :

1-  SO KABABAYAI KO MGA KA-FIR GO SO KAKOWAA KIRAN A MGA GINAWAI A KNABA PANTAG KO AGAMA IRAN, MAANA BABAYA KIRAN GO KAPAKINGGINAWAI KIRAN A DADN A SABAPIYAN. NA HARAM ANAN KA DUSA SII KO ALLAH.

2-  SO KAPAGINGD KO INGD IRAN SA TATAP APIYAPN DIROO DI MAKAPAGAGAMA SO MUSLIM, NA HARAM DN OTO GO MADODOSAONDN. INONTABO O BA DADN A OKIT A KAPAKA AWA IYAN ROO KA SIIPMAN OTO KO KOKOMAN A MATTGL.

3- SO DII KATHRAVEL KO INGD O MGA KA-FIR A KNABA KAILANGAN NA HARAMPN OTO GO DUSA SII KO ALLAH.

- OPMAN O KAILANGANIYAN OTO NA AYA KAKHAPAKAYNIYAN NA MAADN SO TLO A SHARAT :

1.  MABALOY SO MUSLIM A KATAWANIYAN PHIYAPIYA SO AGAMANIYAN.

2. MABALOY SKANIYAN A MAKASASARIG PHOON SII KO KIPAKAWATANN KO MGA KHASABAPAN SA FITNA.

3. PHKHAGAGANIYAN A KIPAPAYAGNIYAN KO DIINIYAN DII KANGGALBKA KO SIMBA SII KO ALLAH.

AYA MGA IMPORTANTI A PHKHASONGOWANO MUSLIM KO INGD A KA-FIR NA ;

1-        KANDAAWAH.

2-       KANDAGANG.

3-       KAPAKIBOLONG.

4-       PANTAG KO KAMAPIYAAN O INGD DATAR O MGA DATU.

5-       PANTAG KO KAPAGANAD SA ILMO IGIRA A DAA MAPHAGANADON KO INGD O MGA MUSLIM.

4- SO KAPHPHAMANGPD KO MGA CELEBRATION KO KHISSLAAN KIRAN A MGA GAWII NA GIYANAN NA HARAM ANAN A DUSA SII KO ALLAH. SA MARORORANSAMPN SO KABABALOY O KAPHZMANGA KIRAN A MGA PIPIYA A KATHARO SANGKANAN A MGA GAWII IRAN A MGA ALA A HARAM PN ANAN GO DUSA SII KO ALLAH.

5- SO KAPANANAYANI KIRAN KO MATTNDO A SIRAMBO I KHIOLAOLAWN, NA HARAM SO KAPANANAYANI KIRANON, SII KO KANDITAR KATHARO GO SO IPHKHIDIA KO AROG A LAWAS PDON SO BOK. NA HARAMPN ANAN.

6- SO KAKOWAA A INOGOPA KO MGA KA-FIR, SA PHPHAKI ILAY KIRAN SO MGA SECRETO O MGA MUSLIM, GO DISIRAN DII IPMOSAWIRA PANTAG KO MGA SHAY A PARABO KO MGA MUSLIM. GIYANAN NA HARAM ANAN A KHADUSAON SO MGA MUSLIM. ( INONTABO O BA DADN A OKIT OBA SAN DI KANGGOLAOLAA KA PARA KO KAMAPIYAAN A DAYAMANG O MGA MUSLIM DATAR O KAPAKIPHASADA KIRAN SA PARA KO KAMAPIYAAN O MGA MUSLIM IGIRA A MAS MABAGR SO MGA KA-FIR A DISIRAN DATAR A GIYANAN A BTAD SA PILIPINAS).

7- HARAM SII KO MUSLIM OBA NIYAN ZOSOLDAAN SO KA-FIR APIYAPN LOLOTIYAN ODI NA CLASMETIYAN.

 GO DATARIYAN A DI KHAPAKAY OBANIYAN ZOSOLDAAN SA PARABO KO KAMAPIYAAN A KADODONIYAI.

 GO DI KHAPAKAY OBANIYAN DII PAMISITAA SII KO WALAYNIYAN SA PARABO DISIRAN DII MAKAKHALAYAMA, ODI NA KANGGITA GITA, KAGIYA GIYANAN NA PD KO BITIYARA KO MUWA-LA-T GO DIRON MAKASASARIG OBANIYAN KAMORALAI SII KO AGAMANIYAN ODI NA SO LAWASIYAN.

OPMAN O AYA SABAP A KAPHAMISITANIYAN NA KAGIYA LOLOTIYAN ODI NA SIRINGANIYAN NA SO ISLAM NA ISOSOGOIYAN SO KAPHIYAPIYAI KO LOLOT GO SIRINGAN NA DAA PROBLIMA ROO.

ODI MAMBO NA PARA SII KO KAPHLAYAMANIYANON SII KO PAPARANGAYAN O MUSLIM KA KALOKALO NA MAGISLAM.

 ODI NA PARA DISKANIYAN KABINASAAN O KA-FIR KO AGAMANIYAN GO SO GINAWANIYAN NA MIYAPAKAY ANAN SABAP KO KINANGLAN ANAN O MUSLIM.

SAMAWTO NA SII DEPENDI SII KO NIAT AGO SO SABAP A KIPHNDOLONAAN O MUSLIM KO KA-FIR.

2- SO KHAPAKAY RON SO KINDOLONAAN SII KO KA-FIR KA KNABA MAKASOSOLD SII KO BITIYARA SA "AL-WALA WAL BARA".

KAILANGAN A SABOTN O MUSLIM A SO KHIPHAPANTAGN O MUSLIM KO KA-FIR NA SO MGA KA-FIR NA 4 PAT KACLASSI :

1- SO MGA "MUAHEDOON". SIRAN SO MGA KA-FIR A SO INGDIRAN NA MIYAKIPHASADA KO INGD O MGA MUSLIM.

DATAR ANAN SO KIYAPAKI PHASADA O RASOLOLLAH S.A.W. KO MGA QURAYSH SA MAKKAH KO "HODAYBIYYA".

SO KAPHASADA O INGD O MGA MUSLIM AGO SO INGD O MGA KA-FIR NA KHAPAKAY ANAN SA DATAR O KIYATHARO AWN O ALLAH :

 (  وَإِنْ جَنَحُوا لِلسَّلْمِ فَاجْنَحْ لَهَا وَتَوَكَّلْ عَلَى اللَّهِ إِنَّهُ هُوَ السَّمِيعُ الْعَلِيمُ) AL-ANFA-L 61

MAANA : O LINGGI SIRAN KO KAPAKI PAZADA NA LINGGIKAWN MAMBO NA ZARAKANGKA KO ALLAH KA SO ALLAH NA PHPHAKAN-G A LBI A MATAO.

NA IGIRA A GIYANAN I BTAD KO PAGLATAN O MUSLIM AGO SO KA-FIR A ADN A MAADN A KAPASADAN KO PAGLTANO MGA INGD IRAN NA DI KHAPAKAY HARAM KO MUSLIM OBANIYAN BONOA SO KA-FIR ODI NA BANIYAN PMARATAI.

2- SO MGA " ZIMMIYOON". SIRAN SO MGA KA-FIR A BABALING SII KO INGD A MUSLIM NA MIYAKIPHASADA SIRAN KO DATU O MGA MUSLIM A PHMBGAY SIRAN SA ZAZIYAH NA ASAR MAMBO KA MASISIYAP SIRAN KO KABABALING IRAN ROO.

NA GIYANAN NA KHAPAKAYPN ANAN ANGGOLAOLAAN O MUSLIM, NA KAILANGAN NA MASIYAP SIRAN O DATU O MGA MUSLIM GO HARAM SO MGA ROGO IRAN OBA TDAKA O MGA MUSLIM. TAMANPN SA KABABALOY IRAN A "ZIMMIYOON".

3- SO MGA "MOSTA-MINOON". SIRAN SO MGA KA-FIR A PHZONG SII KO INGD O MGA MUSLIM NA KOMOKOWASURAN SA KASARIGAN KO DATU O MGA MUSLIM SA DISIRAN KABINASAAN ODI NA AYA MAKASASARIGON NA PD KO MGA TAW NORMAL, AYA OTO IBARAT A KIYASOLD O KA-FIR KO INGD A MUSLIM NA SABAP SA PHAMISITAON ODI NA PHNDAGANGON SA DI MATHAY SA KNA OBA TATAP.

NA HARAM MAMBO SO KATDAKA KO ROGOIYAN KAMAMPN SA ADN A MAKASASARIGON KO MGA MUSLIM.

GIYANGKANAN A TLO NA KHAPAKAY A MANGGOLA OLA KO MGA INGD O MGA MUSLIM INONTABO SII SA JAZEERATIL ARABIAH KA DI ANAN KHAPAKAY INONTABO O KAILANGAN SIRAN O SA JAZEERAIL ARABIAH.

DATAR O KIYAPAKA TARGA O RASOLOLLAH S.A.W. KO MGA YAHODI SA KHAYBAR SABAP KO KAILANGANIYAN SIRAN KO KAPHNGGALBKI IRAN KO MGA LUPA SA KHAIBAR KA SIRAN I LBIRON A MGA TATAO.

4- SO MGA "HARBEYOON". SIRAN SO INGD A KA-FIR A KNABA MATATAGO SANGKOTO TLO A MIYA ALOYTANO APIYAPN KNABA IRAN PHNGGOBATA SO INGD O MGA MUSLIM, NA BASTA A DAA KAPASADAN IRAN AGO SO MGA MUSLIM NA INGD OTO A "HARBEYOON". NA PATOT KO MGA MUSLIM A KHIPRANGN IRANON SA LALAN SII KO ALLAH. GIYANGKANAN A MGA KA-FIR A MGA "HARBEYOON" NA SII KIRAN MANONOMPANG SO MGA AYAT GO SO MGA HADITHS A INISOGOON ALLAH GO SO RASOLOLLAH S.A.W. SO KAPRANGA KIRAN.

SO PATOT SII MUSLIM A KANGGOLAOLAANIYANON KO KHIPHAPANTAGNIYAN KO KA-FIR A KNABA "HARBIY" :

1-  SO KASIYAPA KO MGA KA-FIR A MAALOSOD SANGKTO A TLO A INOSAYTANO KA HARAM SO KATDAKA KO ROGO IRAN GO SO KANGGOLA OLAI KIRAN SA MARATA.

2- SO KIPAGINONTOLANN KIRAN KO MGA KABNAR IRAN, GO SO KAKOKOMA KIRAN KO ONTOL IGIRAN A SII SIRAN MIKHOKOM KO KOKOMAN A ISLAM.

3- SO KANDAAWAI KIRAN SA ISLAM SA KNABA TGL .

4- DI KHAPAKAY OBA SIRAN TGLA A AWAAN IRAN SO AGAMA IRAN, NA O PHAGISLAM SIRAN NA THARIMAAN KIRAN OTO.

5- HARAM SII KO MUSLIM OBANIYAN PAMABAI SA PANGARASIYAN IYAN SO KA-FIR A PD SANGKOTO A TLO A MIYA ALOY .

PHITHARO O RASOLOLLAH S.A.W. :

(مَنْ قَتَلَ مُعَاهَدًا لَمْ يَرِحْ رَائِحَةَ الجَنَّةِ، وَإِنَّ رِيحَهَا تُوجَدُ مِنْ مَسِيرَةِ أَرْبَعِينَ عَامًا )AL-BOKHARI.

MAANA : SADN SA TAW A BONOON IYAN SO ADN A KAPASADANIYAN KO MGA MUSLIM A KA-FIR NA DINIYANDN MABAW SO BAW O SURGA, A SO BAW O SURGA NA MANGANGAYOGAN KO PATPOLO RAGON A ILALAGON. ( BOKHARI ).

GO PHITHARO IYAMPN :

(مَنْ قَتَلَ رَجُلًا مِنْ أَهْلِ الذِّمَّةِ لَمْ يَجِدْ رِيحَ الْجَنَّةِ ) NASA-I.

MAANA : SADN SA TAW A MONO SA ISABO A MAMA KO MGA "ZIMMEYOON" NA DINIYANDN MABAW SO BAW O SORGA ( NASA-I CORRECT TIGI AL-BA-NY ).

6- HARAM KO MUSLIM OBANIYAN AKALA SO KA-FIR A KNBA "HARBEY" KO DAGANGANIYAN GO SO SALAKAWRON A TAMOKIYAN.

PHITHARO O RASOLOLLAH S.A.W. :

(أَلَا مَنْ ظَلَمَ مُعَاهِدًا، أَوِ انْتَقَصَهُ، أَوْ كَلَّفَهُ فَوْقَ طَاقَتِهِ، أَوْ أَخَذَ مِنْهُ شَيْئًا بِغَيْرِ طِيبِ نَفْسٍ، فَأَنَا حَجِيجُهُ يَوْمَ الْقِيَامَةِ ) ABU DA-WD. CORRECT TIGI AL-BA-NY.

MAANA : BADI SADN SA TAW A LALIMNIYAN SO "MUA-HID" ODI NA PAMAKAITOON IYAN ODI NA PATORAYAN IYAN SA DINIYAN KHAGAGA ODI NA KOWAANIYAN SO PD KO TAMOKIYAN A DINYAN MIRIRILA NA SAKNDN I MIPHNDAAWAINIYAN SA ALONGAN A MAWRI.

7- HARAM KO MUSLIM OBANIYAN DII PANAROI SA MARATA SO KA-FIR A KNABA "HARBEY".

PHITHARO O ALLAH :

(وَقُولُوا لِلنَّاسِ ) AL-BAQARA 83.

MAANA : GO THAROINIYO SO MGA TAW SA MAPIYA.

8- WAJIB KO MUSLIM A KAPHIYAPIYAINIYAN KO SIRINGANIYAN A KA-FIR A KNABA "HARBEY".

PHITHARO O RASOLOLLAH S.A.W. :

(مَا زَالَ جِبْرِيلُ يُوصِينِي بِالْجَارِ، حَتَّى ظَنَنْتُ أَنَّهُ سَيُوَرِّثُهُ ) BOKHARI @ MUSLIM.

MAANA : DADN MARINTAS A KAPHPHANGINSANAA RAKN O JIBREEL KO KAPHIYPIYAI KO SIRINGAN TAMAN SA AYA KATAO KORON NA BANIYAN PHAKAWARISA.

9- WAJIB KO MUSLIM A SMBAGNIYAN SO SALAM O KA-FIR IGIRA A SIYALAM IYAN SO MUSLIM SA ' ASSALA-MO ALAYKO '. NA IZMBAGIYANON SO ' WA ALAYKOM'. GIYANAN SO KATHARO O RASOLOLLAH S.A.W. :

(إِذَا سَلَّمَ عَلَيْكُمْ أَهْلُ الكِتَابِ فَقُولُوا: وَعَلَيْكُمْ ) BOKHARI @ MUSLIM.

MAANA : IGIRA SIYALAM KANO O MGA AHLUL KITAB, NA THAROANIYO SO 'WA ALAYKOM'. OGAID NA DI KHAPAKAY OBA PANGONA SOMALAM SO MUSLIM.

PHITHARO O RASOLOLLAH S.A.W. :

(لاتبدأوا اليهود والنصارى بالسلام ) ( MUSLIM).

MAANA: OBANIYO PANGONAI SO YAHODI GO CRISTIAN SOMALAM.

NA KHAPAKAY KO MUSLIM A IPHTHALONIYAN KO KA-FIR SO PHKHABABAYAANIYAN A IPHTHAWAGON DATAR O PATOGINANIYAN.

GO KHAPAKAYPN KO MUSLIM A SMANGNIYAN SO KA-FIR IGIRA A MIMBAWATA.

GO KHAPAKAYROMPN A SMANGNIYAN MUNA SA THAROON IYAN SO' AHLAN ' ODI NA SO SALAKAW SAN A PARA IPHLAYAM KO PUSO IYAN SA KAPAGISLAM ODI NA PARA KO KAMAPIYAAN A MAPAPAKAY ODI NA PARA DINIIYAN KHAMORALAAN.

KHAPAKAYPN KO MUSLIM A TIBAWNIYAN SO KA-FIR IGIRA A ADN OTO A MAPIYA ISOSOGO O ISLAM A KHARISOLTANIYAN, OGAID NA DINIYAN BADN MIPHANGNI SA RILA SO MIYATAY A KA-FIR AGO DINIYAN MIPHANGNI SA LIMO KA DI KHAPAKAY.

SO MGA SHAY A PAPAKAYN ODI NA MUSTAHAB SO KINDOLONAANON SO KA-FIR A KNABA " HARBEY".

1-      KHAPAKAY A GAMITN SO KA-FIR A PAKAPHNGGALBKN KO RK A MUSLIM ASAR KA KNABANIYAN KAPMAMAPOROI SO MGA MUSLIM, KHAPAKAYPN A APINAN SO  ORASIYAN PARA IPHNGGALBKYAN SII KO MUSLIM.

SO RASOLOLLAH S.A.W. NA INIAPINANIYAN SO ORAS I ABDULLAH AL-ORAYQAT PARA KANDALILANIYAN SIRAN KO KIYATRANSPER IYAN SA MADINAH AGO SO ABU BAKR R.A..  GO SO RASOLOLLAH S.A.W. NA PIYAKANGGALBKYAN SO MGA YAHODI SA KHAYBAR KO MGA LUPA A TIYABAN O MGA MUSLIM.

2-      MUSTAHABB KO MUSLIM A KAPHIYAPIYANIYAN KO KA-FIR A MAKAKHAKAILANGAN, DATAR O KAZDQAINIYAN KO FOBRI A KA-FIR GO SO SALAKAWRON PARA OTO KO IPHLAYAM KO PUSO IYAN SII KO ISLAM.

3-      MUSTAHABB SO KHISOMPATAAN KO LOLOT A KA-FIR, DATAR O LOKS O TAW ODI NA PAGARINIYAN GO SO SALAKAW KIRAN, SA PHMBGAN SA MGA PAMM-GAYAN GO PHMBISITAAN. NA KNABA BADN IPHAGONTODA SA BAMBALOYA A DATARDN O MUSLIM A KIPNDOLONAAN KIRAN.

4-      KHAPAKAY PHIYAPIYA SO MGA KA-FIR DATAR O KAPHMBGI KIRAN SA MGA PAMM-GAYAN GO SO SALAKAWRON A PARA IPHPHANGOYAT KIRAN KO KAPAGISLAM, ODI NA SAMBI O DIIRAN KAPHRATARATAI KO MGA MUSLIM GO SO SALAKW SAN.

PHITHARO O ALLAH :

(لا يَنْهاكُمُ اللَّهُ عَنِ الَّذِينَ لَمْ يُقاتِلُوكُمْ فِي الدِّينِ وَلَمْ يُخْرِجُوكُمْ مِنْ دِيارِكُمْ أَنْ تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ) MOMTAHINA 8.

MAANA : DARKANO SAPARN O ALLAH SO MGA SO MGA –KA-FIR- A DISIRAN RKANO MAKIPHMBONOAY KO KAPHIYAPIYAINO KIRAN GO SO KIPAGINONTOLANN IYO KIRAN, KA MATAAN A SO ALLAH NA PHKHABABAYAANIYAN SO MGA OONTOL.

5-      KHAPAKAY A SAKAWN O MUSLIM SO KA-FIR OPAMA KA MAMISITAON, GO KHAPAKAY A MAMISITA SO MUSLIM KO KA-FIR, OGAID NA DI KHAPAKAY SO KATARIMAA KO IMVETERAN O KA-FIR SABAP KO MADADALM ROO SO KAKHABABAYAI NA PHAKASOLD KO "AL-WALA".

6-      KHAPAKAY SO KAKAN O MUSLIM A PDIYAN SO KA-FIR KO MGA SAGAD A PHKHAOLAOLA OGAID NA KANBANIYAN BADN KHOWAA GINAWAI ODI NA SALIYANTI SO KA-FIR KA DIOTO KHAPAKAY.

7-      KHAPAKAY A INDOLONA O MUSLIM SO KA-FIR KO MGA GALBK A KADODONIYAI DATAR O KAPHASAI KIRAN ODI NA KAPAMASA SII KIRAN GOSO DIKIRAN DII KAPAKI ZANDAI SA TAMOK. MAYAOLA OLA ANA SII KO MASA O RASOLOLLAH S.A.A. GO MIYAOLAWLAPN ANAN A SO MGA BIYAG A MGA TAG A MAKKAH KO KIYATHIDAWA SA BADR NA SO DAA KHIYAONIYAN SA GINAWANIYAN NA PIYAKIPAMANGDAORON SO MGA WATA O MGA WATA O MUSLIM KA GIYOTO I KHIAONIYAN SA GINAWANIYAN.

8-      KHAPAKAY A MANGAROMA SO MUSLIM A MAMA SA KA-FIR A BABAY A KNABA BARAZINA SA AYA SHARAT NA DI KHABINASAAN SO MGA WATA IYAN SA BASIRAN MAMBO MAKAFIR. SII ANAN KO MGA YAHODI AGO CRISTIAN, NA SO SALAKAW KIRAN NA DI KHAPAKAY.

  SOPMAN SO BABAY A MUSLIM NA DI KHAPAKAY HARAM OBA PAKIPANGAROMA SA MAMA A KA-FIR.

9-      KHAPAKAY KO MGA MUSLIM A MAKITABANG SIRAN KO MGA KA-FIR KO KAPAGRNA IRAN KO MGA RIDOAY IRAN A DII MAMINASA IGIRA A MIYAADN SO DOWA SHARAT :

1-      NISISITADN SO KAPAMANGNI IRAN SA TABANG KO MGA KA-FIR SABAP SA KHASOLDAN SIRAN O MGA RIDOAY IRAN A DII MAMINASA.

2-      MASIGORADO A DAA RARAD IRAN A MARATA SII K MGA MUSLIM, GO AYA MAKAPANGONGONDATO KIRAN NA SO MGA MUSLIM, GO TITIKAYAN O MGA MUSLIM SO PHZOWAANIRAN.

10-   KHAPAKAY KO MUSLIM A SOMONG SII KO KA-FIR A DOCTOR PARA KO KAPAKIBOLONG.

11-   KHAPAKAY A IBGAY SO ZAKA-T KO MGA KA-FIR A PHLAYAMN SO PUSOIRAN KO ISLAM, ODI NA SII KO MGA DATU IRAN PARA KO KAMAPIYAAN O ISLAM.

12-   KHAPAKAY A MAKIPAGPDA SO MUSLIM KO KA-FIR KO KANDAGANG, NA KAILANGAN BADN NA KATITIKAYANIYAN O MUSLIM SO PHKHAOLAOLA O DAGANGAN IRAN PARA DI KHASAOGAN SA HARAM SO DAGANGAN IRAN.

13-   KHAPAKAY A TARIMAAN SO PAMM-GAYAN O KA-FIR A NORMAL KO MUSLIM IGIRA A DAA MADADALMON A KAPASONDONG O MUSLIM. MIYANGGOLAOLA ANAN O RASOLOLLAH S.A.W. KO MADAKL A MGA MUSHRIK.

OGAID NA DI KHAPAKAY SO KATARIMAA KO PAMM-GAYAN IRAN OPAMA KA AYA SABAPIYAN NA SO MGA SSLAANIRAN A MGA GAWII IRAN.

14-   KHAPAKAY A NGGALBK SO MUSLIM KO KA-FIR, ASAR KA KNABA KAPAGMID KO WALAY A KA-FIR A PERSONAL KA SII KO MGA OFFICENA.

GIYANAN I MGA KOKOMAN A MAPAPADALM KO KINDOLONAAN O MUSLIM KO KA-FIR, A KAILANGAN NA KATAWAN O MUSLIM KA PARA DINIYAN KHASALIMBOTAN SO AGAMANIYAN NA DINAYAN MAMBO KHASALIMBOTAN SO MIMBABALAIYAN A KNABA MUSLIM.

SII ANAN MATATAGO KO KITA-B A : MUKHTASARO TAS-HEELOL AQEEDA AL-ISLA-MIYAH, A INISORAT I AL-SHAIKH : U. Dr. ABDULLAH BIN ABDL AZEEZ IBN JIBREEN R.T. A MEMBER SA AL-IFTA SA SAUDI ARABIAH. ISA SKANIYAN KO KINILALA A KO MGA ALA A ULAMA SA DUNIYA SABAP KO ILMOIYAN GO SO KAPIYANIYAN I PANARIMA "AQEEDA".

NA KHATOOMPN ANAN SII KO MGA KITAB A INISORAT I SHAIKH ABDUL AZEEZ IBN BA-Z GO SI SHAIKH MUHAMMAD BIN SA-LIH AL-UTHAIMEN GO SI SHAIKH SA-LIH AL-FAWZA-N GO SO MGA PD A MGA ALA A ULAMA A MGA SALAF I AQEEDA.

DIROBASA O PAGARINIYO : "ABU MUEEN" ABDUL JALIL P. FA'KER (MUH'D RAYYA'N HAKEM ).