"SO PAMONTOSAN O PANARIMA O MGA "SALAF AL-SA-LIH" KO MGA SIFAT O ALLAH"

======================================================================

ISA A PHKHABRGANON SO MGA TAW A MARGN A KAPZABOTA IRANON NA SO ANDAMANAYA I OKIT A  KATHANTOWA SII KO ALLAH SII KO MGA SIFATIYAN.

AYA SABAPIYAN NA KAGIYA MIYAKATALINGOMA SO PD SII KO MGA TAW A KHIPAKASISILAY SO PANARIMA IRAN SII SANGKAI A MGA IRAN O ALLAH GO MGA SIFATIYAN NA INOSAY IRAN SO MGA PANARIMA IRAN IRANON NA PHNDADAGAN IRAN SO MGA TAW SANGGOLALAN KO  MGA "SHOBAHA-T A MGA KATHARO KA ANON PHKHABRGI SO DIRON DII MAMAKIN-GN KA ANGKIRAN MITAPI, NA MIYAKAMBAAL SIRAN SA SAKITA OLO O MGA LULUBAY I PAMIKIRAN SA KIYABRGAN SIRAN SII KO PANARIMA IRAN KO MGA SIFAT O ALLAH O ANTONAA MANGADAY I PHIYOR A PANARIMA SAN O MGA SALAF AL-SA-LIH A SIRAN SO MGA SAHA-BA GO SO MGA PIPIYA KO MGA TA-BEEN A ININDAO KIRAN O RASOLOLLAH S.A.W..

SABAP ROO  NA MIYAPIKIR TANO A PHAKARAYAGN TANO AYA SA MAKAPMT IMANTO KA BADI KALO KALO NA MAKALIWANAG PHIYAPIYA KO MGA LULUBAY I PAMIKIRAN  SO THITHO A KAPOPONTOSAN KO PANARIMA ODI NA PARATIYAYA O MGA "SALAF AL-SA-LIH" PANTAG SANGKAI A MGA SIFAT O ALLAH S.W. KA AN DADN A BARON PHKHI IZA O GINAWA , SA KATAYA SO KATANTOWANIYAN KO KATATAGO IYAN KO KADANDAN O MGA KITAB O MGA ULAMA A MGA SALAF :

1-  ( الإيمان بما ورددت به نصوص القرآن والسنة الصحيحة من أسماء الله وصفاته إثباتًا ونفيًا).

MAANA :  SO KAPARATIYAYAA SII KO NGANIN A MIYA ALOY A MGA DALIL SII KO QUR-AN GO SO SUNNAH A CORRECT PANTAG SII KO MGA INGARAN O ALLAH GO SO MGA SIFATIYAN, SA PHNGGOLALAN SA KHATHANTOWA SII KO  ALLAH KO TIYANTONIYAN SA GINAWANIYAN GO TIYANTORON O RASOLOLLAH S.A.W., NA GO SO KAPAKADAAWN KO MGA SIFAT A PIYAKA DAIYAN SA GINAWANIYAN NA GO PIYAKADAON  O RASOLOLLAH S.A.W.

AYA PD SII KO MGA DALIL SAYA NA GIYANGKAI A KHAALOY :

(وَلِلَّهِ الْأَسْماءُ الْحُسْنى فَادْعُوهُ بِها ) AL-A'RA-F 180.

MAANA : GO SO ALLAH NA ADN A MGA NGARANIYAN A LBI A MGA PIPIYA NA PANGNIKANORON SANGGOLALANON.

(وَلِلَّهِ الْمَثَلُ الْأَعْلى وَهُوَ الْعَزِيزُ الْحَكِيمُ  ) AL-NAHL 60.

MAANA : GO SO ALLAH NA ADN A MGA SIFATIYAN A MGA POPORO, A SKANIYAN SO LBI A MABAGR GO MAONGANGN. ( MIYA ALOY SAN SO SIFAT O ALLAH A BAGR GO KAONGANGN ).

(وَيَبْقى وَجْهُ رَبِّكَ ذُو الْجَلالِ وَالْإِكْرامِ ) AL-RAHMA-N 27.

MAANA : GO KHALAMBA SO PARAS O KADNAN KA A SO KHIRK KO KABSARAN NA GO PAGADAT. ( KAWTO SO SIPAT O ALLAH A " PARAS " A MIYA ALOYRON ). GO MADAKLPN SO MGA PD ANAN A MGA SIFAT O ALLAH A SALAKAW SAN A TIYANTONIYAN SA GINAWANIYAN GO TIYANTORON O RASOLOLLAH S.A.W.

(وَأَنَّ اللَّهَ لَيْسَ بِظَلاَّمٍ لِلْعَبِيدِ  ) ANFA-L 51.

MAAN : GO MATAAN A SO ALLAH NA KNA OBANIYAN ZALIMBOTI SO ORIPIN. ( KAWTO SO SIFAT O ALLAH A " DI PHANALIMBOT " A MIYA ALOYRON ). GO MADAKLPN SII SA QUR-AN A MGA SIFAT A PIYAKADAIYAN SA GINAWANIYAN.

(وَأَنَّ اللَّهَ لَيْسَ بِأَعْوَرَ )

MAANA : GO MATAAN A SO ALLAH NA KNA OBA BOLAG SO MATANIYAN. ( KAWTO SO SIFAT O ALLAH A " KANABA BOLAG SO MATANIYAN " A MIYA ALOYRON ). GO MADAKLPN SO MGA PDANAN A MGA SIFAT A PIYAKADA O RASOLOLLAH S.A.W. KO ALLAH S.W.

2- (تنزيه الله جل وعلا عن أن يشبه شيء من صفاته شيئًا من صفات المخلوقين. ).

MAANA : SO KAPAKADAA SII KO ALLAH A MALA AGO MAPORO KO KIPANOLAGIDNON ODI NA KIPANAGINDAAN KO MGA SIFATIYAN KO MGA SIFAT O MGA KAADNIYAN SA MAYTOBO. – DADN A BA PLAGIDAN O SIFAT O ALLAH AGO SO SIFAT O MGA KAADNIYAN A MAYTOBO-.

KATAYA SO PD A MGA DALIL SAYA :

(لَيْسَ كَمِثْلِهِ شَيْءٌ  ) AL-SH0-RAH 11.

MAANA : DAA BA DATAR O ALLAH A SHAY'.

(فَلا تَجْعَلُوا لِلَّهِ أَنْداداً وَأَنْتُمْ تَعْلَمُونَ  ) BAQARAH 22.

MAANA : GO DINIYO MBALOWI SO ALLAH SA IRINGA ODI NA SAKOTOWA A SKANO NA KATAWAN IYO A DAA IRINGAIYAN GO DAA SAKOTOWAIYAN.

( ولم يكن له كفوا أحد ) AL-IKHLAS 5.

MAANA : GO DADN A BA PHAKATINGKI NAGO PHAKALAGID  SIIRKANIYAN A ALLAH A ISABO.

3- (قطع الطمع عن إدراك كيفية اتصاف الله بتلك الصفات  ) .

MAANA : SO KATHPHDA ODI NA KAPOTOLA KO PANGINAM SA BA KHAGAGA O MANOSIYA A KATOKAWINIYAN SII KO KATANTOWAN O ROPAAN O MGA SIFAT O ALLAH S.A.W.

KATAYA SO PD KO MGA DALIL SAYA :

(وَلا يُحِيطُونَ بِهِ عِلْماً ) TA-HA 110.

MAANA : GO DIIRANDN KHAGAGA OBA IRAN MASSMB A ILMO SO ALLAH. – DIIRANDN KHAGAGA OBA IRAN KATOKAWI SO THITHO A ZA-T O ALLAH GO SO ROPAAN O MGA SIFATIYAN -.

(وَلَا تَقْفُ مَا لَيْسَ لَكَ بِهِ عِلْمٌ إِنَّ السَّمْعَ وَالْبَصَرَ وَالْفُؤَادَ كُلُّ أُولَئِكَ كَانَ عَنْهُ مَسْئُولًا ) AL-ISRAH 36.

MAANA : GO DINGKA PHZOLDI SO DAA BANGKAWN SABOT KA MATAAN A SO PAMAMAKIN-GAN GO SO PANGILA ILAYAN GO SO PUSO NA LANGON ANAN AYA KHASOWA IYAN NA IPAGIZA KO KHIRKON.  

4- ( القول في بعض الصفات كالقول في بعض الآخر  ).

MAANA : SO KATHARO A KAPHTHANTOWA SII KO ALLAH KO MGA PD A SIFATIYAN  NA DATARDN OTO MAMBO A KATHANTOWAON SII KO MGA PD A SIFATIYAN. – DI KHAPAKAY OBA THANTOON KA SII KO ALLAH SO PD A MGA SIFATIYAN NA DINGKAWN THANTOON SO MGA PDIYAN, KA SADN SA DALIL O TIYANTONGKA SII KO ALLAH A MGA SIFAT NA GIYOTODN MAMBO I DALIL O DANGKAWN TANTOWA, NA DI KHAPAKAY OBA ANAN PAKAMBIDAA-.

AYA SABAP A KIYA THAROA SAYA O MGA ULAMA A MGA SALAF NA KAGIYA SO PD KO MGA TAW A MIYAMAKA SILAY SO MGA PANARIMA IRAN NA PHTHANTOON IRAN SO PD KO MGA SIFAT O ALLAH NA DIIRAN THANTOON SO MGA PDON KA PHPHAMAKASILAIN IRAN SO MGA MAANA NIYAN ODI NA DIIRANON IPHMAANA SO PHIYOR A MAANA NIYAN ; DATAR O MGA ASHA-IRAH GO SO MGA MA-TORIDIYYAH.

NA TIG O MGA ULAMA A MGA SALAF A DIYANAN KHAPAKAY KA SADN SA DALIL KA KO KAPHTHANTOWANGKA KO MGA PD A SIFAT O ALLAH NA KHIDALIL RKA MAMBO OTO SA KATANTOWAAMI RKA  SII KO MGA PD A SIFAT O ALLAH  A DINGKA THANTOON.

5- ( أن الكلام في الصفات فرع عن الكلام في الذات ) .

MAANA :  MATAAN A SO DII KATHARO PANTAG SII KO MGA SIFAT O ALLAH NA SAPAK OTO O DII KATHARO SII KO ZA-T O ALLAH. – OPAMAKA KO DITANO KHAGAGA OBATANO KATOKAWI SO KATATANTOWAN O MGA SIFAT O ALLAH S.W. NA SABAP OTO KO DITO KATAWAN SO KATANTOWAN O ZA-T O ALLAH, KA GIYANAN NA ILMO A DADN A BARON MATAO SII KO MGA KAADN KA SOBO SO ALLAH NA SKANIYAN I MATAO SII KO ZA-TIYAN-, APIYA SO MGA MALA-IKAT GO SO MGA NABI NA DIIRAN KATAWAN.

INOWAYA INALOY O MGA ULAMA A MGA SALAF KA AN KATOKAWI O MUSLIM A INOMAN OTO DI KHAGAGA ROMOPA O TAW SO THITHO A ROPAAN O MGA SIFAT O ALLAH KAGIYA DI KATAWN O TAW SO KATANTOWAN O ZA-T O ALLAH NA AYABO A KAKHAGAGA O TAW A MIROPANIYAN NA SO KATAWANIYAN SO  THITHO A ROPAAN O ZA-TIYAN  NA O DIKATOKAWI O TAW SO ZA-T O SHAY NA DINAYANDN KHAGAGA ROMOPA.

IBARAT NA SATIMAN A WALAY A MAPIYA I PARAS NA MIYA ILAYNGA SKANIYAN GO MIYAKASOLD KAWN NA LANGON O MGA TAGO IYAN GO SO MGA STYL IYAN NA MIYA ILAYNGA LANGON NA SABAP ROO NA O PHAKIROPAAN RKA SO THITHO A ROPAAN ANGKTO A WALAY NA KHAGAGANGKA A IROPANGKA SO SIFAT ANGKOTO A WALAY SABAP KO MIYAILAYNGA SKANIYAN PHIYAPIYA SA PERSONAL.

ODI MAMBO NA ADN A MIYA ILAYNGA A DATARD ANGKOTO A WALAY SA TAROTOPDN A MLAGID SIRAN, NA KHAPAKAY A MIROPANGKA MAMBO OTO SABAP SA APIYA DANGKA MAILAY NA KAGIYA MIYAILAYNGA SO DATARIYANDN A BTAD A TAROTOP.

 ODI NA MIYAPANOTHOL RKA O DIDN PHAMOKHAG NA INIROPANIYAN RKA SO WALAY SA TAROTOP NA SAMAWTO NA KHAPAY A MIROPANGKA ANGKOTO A WALAY APIYA DANGKA MAILAY KAGIYA MIYAPANOTHOL RKA O DIDN PHAMOKHAG.

NA AYA PAKAIZA NA INO BATANO MIYAILAY SO ALLAH KO ZA-TIYAN SA PERSONAL ?

 ODI NA BA ADN A MIYAILAY TANO A DATARDN O ALLAH KO ZA-TIYAN ?

 ODI NA BA ADN A MIYAKAPANOTHOL RKTANO KO ROPAAN O MGA ZA-T O ALLAH A DI PHAMOKHAG ?

AYA SMBAG NA DA! NA SABAP ROO NA DITANO KHAGAGA OBA TANO KATOKAWI I THITHO A KATANTOWAN O  ZA-T O ALLAH NA SO ZA-T O ALLAH NA SAPAKIYAN SO MGA SIFAT O ALLAH, NA DITANO MAMBO KHAGAGA OBA TANO KATOKAWI SO THITHO A ROPAAN O MGA SIFAT O ALLAH.

AYA PINAKA MAKAMAKAMPT A KATHARO O MGA ULAMA A MGA SALAF PANTAG SII KO MGA SIFAT O ALLAH NA GIYAYA :

PHITHARO I SHAIKH ABDURRAHMAN IBN SA-DI :

فالمؤمن الموحد: يصف الله بما وصف به نفسه، ووصفه به رسوله من صفات الكمال على الوجه اللائق بجلال الله وعظمته من غير تمثيل ولا تشبيه ومن غير تحريف ولا تعطيل لشيء من أوصاف الله ) الشيخ عبد الرحمن بن سعدي وجهوده في تو ضيح العقيدة ، 1/ 102 .

MAANA : SO MU-MEN A MUWAHHID, NA SKANIYAN SO DIINIYAN PAKIZIPAT KO ALLAH SO PIYAKI ZIPAT O ALLAH SA GINAWANIYAN, GO SO PIYAKIZIPATON O O RASOLOLLAH S.A.W. SA ROPAAN A COMPLETO A DOMADAIT SII KO KABSARAN O ALLAH NA GO SO KALAIYAN, SA DI IPHANOLAGID GO DI IPHANAGINDA GO DI PHAMAKASILAIN- DI PHANAAWILN- GO DI PHAKADAAN SO MAYTOBO SII KO MGA SIFATIYAN.

GO PHITHARO O NAIM BNO HAMMAD A GORO O IMA'M AL-BOKHARI R.T. :

( من شبه الله بخلقه فقد كفر، ومن أنكر ما وصف الله به نفسه فقد كفر، وليس ما وصف به نفسه ولا رسوله تشبيهاً ) مختصر العلو للذهبي ص184 .

MAANA : SADN SA TAW A ISAGINDANIYAN ODI NA ILAGIDIYAN SO ALLAH – GO SO MGA SIFAT O ALLAH – KO KAADIYAN NA SABNAR A MIYAKAFIR,  GO SADN SA TAW A ONGKIRNIYAN SO NGANIN A PIYAKIZIFAT O ALLAH SA GIYANWANIYAN GO PIYAKIZIPATON O RASOLOLLAH S.A.W. NA SABNAR A MIYAKAFIR, GO KNA OBA SO KAPAKIZIPATN KO ALLAH KO PIYAKIZIPATIYAN SA GINAWANIYAN GO PIYAKIZIPATON O RASOLOLLAH S.A.W. NA BAOTO KAPANOLAGID.