" KOKOMAN O KASIIG NA GO KASIGI "

Assala'mo Alaykom w w.

Sanrkano langon a mga pagari akn so kalilintad na go kapipiya a ginawa.

Allahumma A'meen.

---

Gyangkai a Bandingantano na dowatiman a katharo a kharaniya sii ko maana nyan na go isa isa a basa arabyan na mbida i kokoman sii ko Islam.

Sabap roo na antonae osayan a gyanan a dowa?

Smbag :

- So KASIIG na skanyan so kaphkhasigingka odi na kaphkha inggit ka sii ko MAPYA a matatago sii ko pagaringka, na sarta a mandi dingan dinganka a obawbo khada angkoto a mapya a kalolombokanyan.

Na aarapn ka a sii rka matago odi na aya pinaka minos na asarbo ka madaon na apya rka di mya tago.

Sabap san na myaka rayag a so KASIIG na HARA'M a kokomanyan sii ko Islam.

Phitharo o rasolollah s.a.w. :

( إِيَّاكُمْ وَالْحَسَدَ فَإِنَّ الْحَسَدَ يَأْكُلُ الْحَسَنَاتِ كَمَا تَأْكُلُ النَّارُ الْحَطَبَ )abo dawd.

Maana : Pananggilai nyo so kasiig, ka mataan a so kasiig na phkhnyan so mga galbk a mga pipiya, sa datar o kaphkhana o apoy sii ko makadg a itagon.

Sii sangkanan a hadiths na marayag a kinisogoon o rasolollah s.a.w. sii rktano ko kapananggilai tanoron.

Na gyanan mambo i dalil sa kababaloynyan a HARA'M.

- Ikadwa na so KAPANGASIGI : Na aya rayagan o kapangasigi na so kaphkhainggit odi na khipkhasigin sii ko mapya a matatago sii ko pagaringka, na sarta a mapanganganayngka odi na maarap ka a obakabo mambo phakhakowa sa mapya a datar o matatago sii rkanyan.

Na dingka khababayaan oba mada sii rkanyanyan so mapya a matatagoon.

Maan ; aya kabaya aka na maystidi so mapya a matatago sii ko pagaringka na maka kowakamambo sa dataryan ka para dowakano a katatagoan sa mapya.

Na gyanan na knaba anan ISASAPAR o ISLAM, go knaba anan HARA'M.

Aya mataan na mapya anan i resolta sii ko taw a katatago anon, ka phkhasogo iyan sa kapaka panagontamanyan sa makowanyan mambo so mapya a matatago sii ko pagarinyan ka ansiran maka plagid.

Aya dalil na so katharo o rasolollah s.a.w. :

( لاَ حَسَدَ إِلاَّ فِي اثْنَتَيْنِ رَجُلٌ آتَاهُ اللَّهُ مَالاً فَسُلِّطَ عَلَى هَلَكَتِهِ فِي الْحَقِّ وَرَجُلٌ آتَاهُ اللَّهُ الْحِكْمَةَ فَهْوَ يَقْضِي بِهَا وَيُعَلِّمُهَا) Bokha'ry.

Maana : Daa a ba iphangasigi, odi na daa ba pyaka sigi sigi, inonta angkai a dwatiman:

1- So mama a bigan o Allah sa tamok, na pinggastonyan so tamokyan sii ko mapya, sii ko Isla'm.

2- So so mama a bigan o Allah sa Ilmo na dinyan dii inggolalan na go dinyan dii ipamangdao.

So aya sayabot san na knaba marata so kapangasigi sii ko mapya.

Ibarat na myaka ilayka sa mapya a wata a magi islam na tig ka insha'allah na so wata akn na pakaphaganadn akn mambo na go paka pag islamn akn mambo na go phakamoaysn akn mambo sa Qur'an.

Odi na mismo skadn i minggola ola sii ko mapya a ikasisigingka.

------

Gyanan i Osayan a gyanan a BANDINGAN inosaytano.

Wallahu A'lam.

Wasallallaho ala saydina mohammad wa ala' alihi wa sahbihi ajmaeen.