-" SO KABABALOY O BNAR AGO SO PAGTAWNYAN A SII SA LMBAK ( وسطية أهل السنة ) "-

Alhamdulillahillazi hada'na liha'za, wama' konna linahtadiya lawla' an hada'nalllah, wa sallallaho ala man ja'a bil haqq muhammad ibn abdillah wa a'lihi wa sahbihi wa man wala.

Amma baad :

So islam na isa a khailayan sii ko kababaloy nyan a aya bnar a AGAMA na so kababaloynyan a LMBAK sii ko langowan o mga AGAMA a salakaw ron a phithaong o mga komakamalon.

Na go so pagtaw a komakapt sangkai a agama a bnar na sii siran mambo matatago sii ko LMBAKAN o mga pagtaw na diiran dii miprogo rogod so katatago iran siiko bnar na go kapaka sisilay o salakaw kiran.

phitharo Allah sii sa Qur'an :

( وَكَذَلِكَ جَعَلْنَاكُمْ أُمَّةً وَسَطاً لِتَكُونُوا شُهَدَاءَ عَلَى النَّاسِ وَيَكُونَ الرَّسُولُ عَلَيْكُمْ شَهِيداً ) suratol baqara 143.

Maana :

Go Gyanampn a byaloy ami skano a pagtaw a LMBAK ka angkano mabaloy a somasaksi ko mga taw na go byaloy ami rkano so SUGO so ' Muhammad s.a.w.' a sakasi.

Na tanodan a so kababaloy a LMBAK na goyoto i pinaka mapya, kagiya so kabaloy a LMBAK na sii makandadarpa ko pagltan o dwa a rogo a makambabala, na go sii ko pagltan o kapanabora a go so kapakada.

So Pagtaw o islam na myabaloy siran a LMBAK sii ko Mga pagtaw a PHKHARARANGITAN O ALLAH, sabap ko zisii kiran so knal na go so sabot na aya iran ininggolalan na so sopaka iyan, siran so mga YAHODI. ( المغضوب عليهم ). Na go sii ko mga pag taw a mithari dadag sabap ko disirandn dii mamikal ko mga galbk iran na maaada kiran so knal na go so sabot na salakawdn a diiran kapangampawan, siran so mga CRISTIAN ( الضالين ).

Na so mga pag taw o islam na ininggolalan iran so mga sogoan kiran o Allah sa diinggolalan sa sabot na go knal na siran i myabaloy a tindos ko kapya o okitiran.


So kababaloy o mga pagtaw o Islam LMBAK ko dii kindolonaan na go so panarima iran ko mga NABI o Allah.

So mga YAHODI na diiran pakambokhagn so mga NABI O ALLAH na sarta a kyarawan iran tomdak rogo o mga nabi a syogo kiran o Allah.

Na so mga CRISTIAN na payakindarpaan iran ko NABI so darpa o ALLAH taman sa SINIMBA irambadan so NABI kagiyakon a wata o Allah.

Sopman so mga philosophier na tigiran a daa ba nabi ka aya mataan na gyangkanan a phnggiraw mga NABI siran na di anan bnar ka matag anan mga taw a mangapipiya i antangan a awidiran a akal i kathanora iran ko pagtaw iran, na diiran dii ipangangalk so naraka na go dii iran ipangoytat so surga ka aniran madnda so pagtawiran na kanaba anan bnar, ka daa ALLAH na daa NARAKA na daa SURGA, na skami a tigiran a mga philosophier na phkhasobraan amipn sa antangan a gyanan a mga taw a dii mnanabi nabi, _ Nauzubillah.

Na so mga pag taw o Islam na MILLMBAK siran sii sangkanan a mga panarima a dadag a myapakasold o shaitan sangkanan a mga pagtaw, kagya skitano na sii ko oryan o kyapaka talingoma rkitano o rasolollah s.a.w. na inibabidon o Allah so tanda sa kababaloynyan a NABI na go rasol sa ayadn a mala a tandaiyan na so QUR'AN a iniropanyan so langowantaman a mlagiddn so katawan o manosya na go so dinyan katawan, sa paparatiyaan tanopn so mga nabi a go mga rasol a syogo o Allah ko mga pag taw ko dapn kapaka oma o NABITANO a Muhammad s.a.w.

pitharo o Allah makapantag sii ko qur'an :

( لَقَدْ أَرْسَلْنَا رُسُلَنَا بِالْبَيِّنَاتِ وَأَنزَلْنَا مَعَهُمُ الْكِتَابَ ) suratol hadeed 25.

Maana :

Sabn sabnar a syogo ami so mga SUGO ami sa kaawidaniran so tanto a mga rarayag a mga tanda na go mga karina kababaloy iran a mga sugo o Allah, na go initoron ami a pdiran so KITAB.

Go phitharopn o Allah :

( وَنَزَّلْنَا عَلَيْكَ الْكِتَابَ تِبْيَانًا لِّكُلِّ شَيْءٍ وَهُدًى وَرَحْمَةً وَبُشْرَى لِلْمُسْلِمِينَ ) suratol nahl 89.

Maana :

Go Initoron amirka - ya Muhammad - so KITA'B ' Qur'an ' sa mababaloy skanyan a rayagan ko langowan taman, na go toroan , na go limo , na go pangoyat ko mimbabayorantang sii ko Allah.

Oryan a gyangkanan a mga A'ya't aya madakl na so datanoron maaloy na go so mga Hadits o Rasolollah s.a.w. na pirogorogod o mga pagtaw o Islam sa minggolalan ko inibgay kiran o Allah a mga pamikiran, na myakapangimbnar siran sa mataan a siran i matatago sii ko bnar na go sii ko Ontol.

- Na sopman so mipantag ko mga SOGOAN O Allah na myaboloy sirampn a lumbak.

dasiran panobra sa datar o thotholan ko tlokataw a mga mama a mymicta sii ko rasolollah s.a.w. a lagid oba iran phagito itoa so sababaloy o rasolollah a LMBAK so mga simbanyan sii ko Allah.

Sa tig angko a isawn a ; sakn na dii ako manambayang sa diakodn phaka torog.

Na tig mambo o isawn a sakn na dii ako mamowasa sa diakodn mboka.

Na tig mambo o ikatlo a sakan na diyakodn phangaroma ka an rakn di phaka alang.

Na dakiran anan kasoatn o rasolollah taman sa pitharo iyan kiran so sopaka o mga katharo iran na oryanyan na tigyan a ; Gyanan i okit akn na sa ikagowadyan so Okit akn na dirakn pd.

Na inisapar paman o islam oba ndarainon so mga sogoan o Allah, aya wajib na minggoalalan skanyan sa dyangka a phkhagaga o oripn o Allah , sa taman sa igira a phkhasakit so muslim odi na dii mlayalayag na inomanampn o Allah so kakhap a papakaynyanon a kiphnggolalan nyan sii ko simba sii ko Allah ka an di kapapasangi ron.


SOPMAN SO KABABALOY O AHLU SUNNAH WAL JAMAA LMBAK PHOON SII KO MGA PAG TAW A KOMYAPT SII KO ISLAM NA KATAYA SO RAYAGAN IRAN.

Mya aloy tano oto kagya a aya pinaka mapya a pagtaw na so mga taw sii siran matatago sii ko LMBAK o mga pagtaw, ka gyanan i byantogan rktano o Allah na go gyanan i inaloy nyan a kailangan a rontano matatago.

Tanodan a sii ko Oryan o Tlo a mga pipiya a timpo " القرون المفضّلة الثلاثة " na myaka dakl so mga panarima na go so mga groupo a mithataridadag a itotompok iran a ginawa iran sii ko Islam, na so Ahlu sunna wal jamaa na dadn maalin so tindg iran sii ko kakkdga iran ko okit o Rasolollah s.a.w. sa taman imanto.

Mya adn so mga SHI'AH, mya adn so mga MU'TAZILAH, mya adn so mga MUSHABBIHA, myaadn so mga KHAWA'RIJ, mya adn so mga KADARIYA, mya adn so mga SOFEYYA, mya adn so mga KOLLABIYYA, mya adn so mga ASHA'IRAH, na sii sangkanan a myanga aaloy na so mga pd san na tanto a madakl a kyanggroupo iran paman, kagya waraan o groupo a phkhaawat sii ko bnar a didn phagayon ayon taman sa disiran mbalingan sii ko bnar.

Na aya isa a awida akal ko kya adn angkai a mga groupo a mithataridadag na gyangkanan a kadaklanon na diinyan tharoon a siran kon i AHLU SUNNAH datar a gyanan a mga ASHA'IRAH.

Misabap san na para di tonganay a maka phkhbota, na so mga AHLU SUNNAH WAL JAMAA na myakha ilangan iran a isa a phkhi kilala sii ko kababaloy iran a ayadn a kkdgn iran a okit na so okit o Rasolollah s.a.w. na go so mga SAHABANYAN na go so mga PIPIYA SII KO MGA TA'BEEN, Na kyabthowan siran sa mga SALAFIYYAH.

A knowa skanyan sii ko " SALAFOL SA'LIH " a siran so mga SAHA'BA a go so mga TA'BEEN.

Na gyangkai a mga taw odi nga mga groupo a mithataridadag na sabap ko matatago kiran a siig na go riit ko AHLU SUNNA WAL JAMAA na aya iphphamtho iran ko mga SALAFIYYA a ayadn so AHLU SUNNA WAL JAMAA na :

- Mga WAHABI.

- Mga HASHAWI.

-Mga Mushabbiha.

Go so salakaw san, a palayadn anan kapamrak ka amay bo ka pyaka rayag na diiran mipamomog so kabokhagan iran, na go so diiran katharo sa iphagangkob iran sii ko mga taw a mga AHLU SUNNAH a taman imanto na sii siran matatago sii sa LMBAK angkai a phimbarang a mga GROUPO myanga babago a khipaka sisilay.


Phangnin akn sii ko Allah a sii sangkai a makampt a osayan na malo a myaka liwanag so kailangan a kaliwanagan sangkai a pagtaw tano a mga muslim a diinggigiloba sii ko thitho a bnar.

wa ssala'm.

- BANDINGAN A MAPONTOK SII KO "JIHA'D" KAPAKI PHRANG SA LALAN KO ALLAH -

Alhamdulillah rabbil A'lameen, wa ssala'to wa sala'mo Ala ashrafil Ambiya'e wal morsaleen, qa'edol muja'hedeen wa ima'mol muttaqeen. 

Amma ba'ad :

So Jiha'd fi sabeelillah na nisisita so katokawi o mga Muslim ko khipapantagn iranon, kagiya sii sangkai a masa na myakadakl so dii tharo pantag sii ko Jihad na so pd na myanobra sii ko limit o islam sii ko Jiha'd na sopman so pd a mga taw na pyanikhalbod iran so pangkatan o Jiha'd sii ko islam taman sa o khaparo na phaka daan iran sa tarotop.

Gyangkai a phmbthowan sa Jiha'd a makapmamaana sa " KAPHRANG SA LALAN SII KO ALLAH " na tanto a mala a pangkatanyan sii ko islam.

Skanyan i podiyong o islam sa datar o kyatharo awn o rasolollah s.a.w. :

( أَلاَ أُخْبِرُكَ بِرَأْسِ الأَمْرِ ، وَعَمُودِهِ ، وَذُرْوَةِ سَنَامِهِ ؟ الْجِهَادُ ) ibn ma'jah.

Maana : baakn rkano phanothola i olo o mga galbk na go onayanyan na go pondiyongyan ? skanyan so kaphrang sa lalan siiko Allah.

Taman sa so Sabaad ko mga ulama na ini itong iran so Jiha'd sa ika nm rokon o Islam sabap ko tanto a kadakl o mga dalil iyan sii sa Qur'an na go sii sa Sunnah.

Aya Mataan na kailangan so kaphnggalbka sii ko Jiha'd na maka okit sii ko mga impitan o kinisogoonon o islam, ka opama ka diron maka okit na khapokas skanyan ko kababaloy nyan a isa sii ko tanto a mga pipiya a galbk sii sa dunya, na go khada so singanin na go antap ko kisosogoonon o Allah s.w., na go phakawatan sii ko kapaka daag so diiron nggalbk.

Na aya badn a ipagonganyan na awida akal na go kabinasaan sii ko mga taw a diiron galbk na plangkap sii ko mga muslim a maka lilibt sangkoto a mga taw a diiron golalan.

Kataya so kailangan a katanodan o mga taw a phkhababayaan iran so Jiha'd :

1- So Jiha'd na aya sabap a kini sogoonon o Allah s.w. na an masimba o mga taw so Allah a Makaliyo siran phoon ko kalibotng o dii kipanakoton sii ko Allah na mialat siran ko kaliwanag o bnar a gyoto so kasimbaan iran sii ko Allah sa tarotop a diiran miphphanakoto sa maitobo.

Phitharo o Allah sa Qur'an : 

( وَقَاتِلُوهُمْ حَتَّى لاَ تَكُونَ فِتْنَةٌ وَيَكُونَ الدِّينُ كُلُّهُ لِلّه فَإِنِ انتَهَوْاْ فَإِنَّ اللَّهَ بِمَا يَعْمَلُونَ بَصِيرٌ ) soratol anfa'l 39.

Maana : Go pakimbonoay kano kiran odi na pranganyo siran ka an di maadn so fitna a gyanan so kapanakoto na go kakhafer, na go an mabaloy so Agama a palayadn so kabaya o Allah, na o taplkn iran oto na mataan a so Allah na so nganin a dii iran nggalbkn na phkhailaynyan.

2- ikadwa na kailangan na so Jiha'd na aya maka totolodon ko Kipnggolalan non na so SABOT a makatitiyokop sii ko mga kokomanyan sii ko islam, na gobo so maratabat a skanyan a phakatolodn sii ko SABOT ka an katatagoi sa KAWARAW so diiron golalan sa masabaryan so phangababaakyan a mga rrgn sangkoto a kiphnggolalan nyan sii ko Jiha'd.

Na Ophoon aya mabaloy a sandiga o dii kinggolalann sii ko Jiha'd na sobo so MARATABAT na mapokason so ILMO A MAKATITIYOKOP sii ko mga kokoman o islam aya mala na so JIHA'D na myapiligro so diiron kinggolalann ka sigorado a daa ipagonganyan a mapya ka aya ipagonganyan na so kasan sara o dii kapagingd na go so dii kapagintaw.

Na sii ko datar anan a sitwation na diskanyan khabthowan sa JIHA'D SHAR'E ka sabap ko myaka liyo skanyan sii ko impitan o kisosogoon sii ko JIHA'D FE SABEELILLAH.

Tanodan a so mga Ahlu sunna wal jama'ah na so diiran kanggalbk na aya maka totolod kiran na so sabot na go so knal, na sopman so mga taw a katharobo na di phnggalbk na mga Ahlul kala'm, na sopman so mga taw didn diinggalbk na maadaon so sabot na so mga SU'FEE , datar anan i kiniropaanon i SHAIKHOL ISLA'M IBN TAYMIYYA R.T.

3- So Jiha'd na kailangan na aya kiphnggolalalnyan na maadn so IMA'M a skanyan i phphaka tanor sii ko mga Muja'hedeen ko kazongiran sa maydan na khokhomandaranyan siran, odi na somosogo ko pd kiran a aya kiran maka khokhomander sii ko kaphzongiran sii ko mga maydan.

So Mga Ulama o Ahlu sunnah wal jamaa na mya IJAMAH siran sa ayabo a kiphnggolalan sii ko JIHA'D na maadn so IMA'M mlagid i Mapya skanyan a datu odi antawaa ka adn a mga dusanyan.

Inontabo oba so mga ridoay na solongn iran so ingd o mga muslim sa pankaw na phkha ato sirandn sa apya daa DATO kaaatagan iran a mattndo.

Na so salakaw san na di khapakay so Jiha'd a di Maunder ko DATO o mga muslim.

4- Kailangan a adn a bagr na go gaas o mga muslim a phnggolalan ko Jiha'd a khialangan iran sii ko mga ridoay iran, isa anan a sharat a inaloy o mga Ala a mga Ulamah sa kiphnggolalann sii ko Jiha'd , na o sopaka iran anan na basirandn khabinasai, ka aya mataan a isosogo kiran ko masa a tanto iran a kalobay na so kapriparado sa bagr a simba na go bagr a sandiyata na go lawas sa disiran pasin maki phmbonoay ko mga ridoay, sa zabarn iran so mga siksa kiran o mga ridoay iran asar ka di zobra sa basiran phamonoa.

lagidanan so masosowa o mga Muslim sii sa makkah al-mokarramah gwani a gopn dii thaonga o rasolollah s.a.w. so islam ko mga sahabanyan a ini sapar kiran o Allah oba Jiha'd sa zabarn irandn angkoto a mga pangalang kiran o mga ridoay iran taman sa phkhabantayanpn o rasolollah so kaphphamonoa o mga korays ko pd ko mga myamaratiyaya sii ko mga a babai pangkatan sii ko kapagintaw, datar o familiya o Ya'ser.

Ogaid na amay ka malo adn a bagr iran na basiran phanarabosawi o mga ridoay iran na go phamonoon siran na pyakay kiran o Allah a mato siran na go ridingn iran a ginawa iran phoon ko kaphakadapanasa kiran o mga ridoay asar ka malo adn a bagr iran.

Phitharo o Allah : 

( أُذِنَ لِلَّذِينَ يُقَاتَلُونَ بِأَنَّهُمْ ظُلِمُوا وَإِنَّ اللَّهَ عَلَى نَصْرِهِمْ لَقَدِيرٌ ) soratol hajj 39.

Maana : inidinan so siran oto a dii pamonoon " sa kaphrang iran " kagya mataan a siran na malalalim siran , na go mataan a so Allah na sii ko kathabanginyan kiran na khagaganyan.

Sa so Jiha'd na taman sa di kabangkita sii ko donyan na malalambadn so kisosogoonon o Allah s.w. pitharo o rasolollah s.a.w. :

( لا تزال طائفة من أمتي يقاتلون على الحق ظاهرين على من ناوأهم حتى يقاتل آخرهم المسيح الدجال ) abo da'ud.

Maana : didn khada so isaka sagorompong sii ko mga ommat akn a disiran dii phrang para sii ko bnar sa phkhadaag iran so diikiran makizmpang taman sa mapatay o last kiran so dajja'l.

Sopman so kokoman o KANJIHA'D na dwa :

1- Fardo ayn. 

2- Fardo kifa'yah.

- Fardo Ayn igira a mya adn angkai a tlo.

a- igira a siyolong o mga ridowan so ingd o mga muslim sa siltan iran so mga muslim na paliyogat dn so kaatowi kiran na sa di mato na myadusa, inontabo so tyabiya o Allah.

b- igira a somiyogo so datu o mga muslim a Jiha'd dn so pagtawnyan na paliyogat kirandn a makanJiha'd siran.

c- igira a myaka pagadapa so saap o mga ridoay ago so saap o mga muslim sa kaphthidawa iran na paliyogat dn so kapakiznsra kiran sa haram so kapalagoy inontabo oba kalalangkoloban siran sa bagr o mga ridoay ka khapakay so kaatras sa phangilay paman a taw sa tiknik.

- Fardo kifa'yah igira a so Jihad na kapangatak sii ko mga darpa o mga ridoay, sa makatitiyokop angkoto a diiron nggolalan.

gyanan i tanto a mapontok a bandingan tano pantag sii ko Jiha'd odi na kapaki phrang sa lalan sii ko Allah, sa madakl a tanto so dapat a osayn tano ogaid na kay tanto matas Datar ibarat o mga balas o KanJIHA'D, go so sanganon o mga bae .

na naino ka khapakay a maka okit badn sa mga pakaiza o maka khakailangan non ka antano ron phphka ogop manmbag ko diyangka a phkha gaga tano.

Wassala'm.

" SABAP A KAMBALASI KO MAPYA A GALBK, NA GO ANTONAA I PINAKAMAPYA KOMGA PHKHAOSAR O MANOSYA "

---------------------------------------- >

Pakaiza i Kim Mayon Abdullah :

ASSALAMO ALAYKOM: Aduna ini ampit rakun a 2 pakaiza:

1) Ino so galubuk a mapiya a da kapniati sa para soa-soat sii ko ALLAH ibarat o so taw na mapikir iyan a phangayam sa KAMBING para negosyo, paka pumbabawata an iyan ka an makadakul nago maphasa nyan. Aya pakaiza na ino mbalasan ta roo o ALLAH?

2) Opama ko so taw na mamola sa kayo (MANGGA/DURIAN) sa aya ni-at iyan na para ko lokus iyan a miyawafat, an pkhioma ko lokus iyan so balas iyan ko dii kanggonai o mga manosiya nago so langona bara niyawa sa giyangkoto a pamomolan. Pakaiza, khapakay oto? JAZAKALLAHU KHAIR!

Kim Mayon Abdullah Muhd Rayyan Hakem...Sumbagangka rakun bo aya khapiyaan. Balasan kawon o ALLAH sa mapiya.

-----

Smbag :

Muhd Rayyan Hakem :

Wa alykom slm w w.

Gyanan a paganay a pakaiza na disan mbalasan.

Kagiya aya paka asal o kakhaoyagan na phphakain, na o kapniati sa mapya na mbalasan o Allah sa Mapya na odi kapniati sa mapya na dimbalasa mapya.

Apyapn mapya angkoto a galbk.

Soman so mga cristian go so mga pd a mga taw na madakl mambo so mga galbk iran a mga pipiya.

Ogaid badn na aya mbidaan tano na apya iran pniati sa mapya so galbk iran na dikiran oto khatarima kagya knaba siran mga muslim.

Sktano pman na opama sii ko mga datar anan a galbk a papakayin o Islam na aya kamblasiron sa mapya na o kapniati sa mapya.

Phitharo o rasolollah s.a.w. :

( إِنَّمَا الأَعْمَالُ بِالنِّيَّاتِ، وَإِنَّمَا لِكُلِّ امْرِئٍ مَا نَوَى ) bokhari.

Maana : Ayaboman a bagian o taw sii ko mga galbkyan na so kiypniatanon, na go ayabo a khaparoli o manosya na sa myapniatanyan sa mapya a galbkyan.

Na so kakhaoyagan sa soti a kaoyagan na o aya niaton na mapya na mapya i balas.

Na o aya niaton na marata na marata i balas.

------

Gyanan a ikadwa a pakaiza na aya mapipikir san na so kapamala o taw sa pamomolan a dii kanggonaan a aya arapyanon na ba kalo kalo na so diiron makanggona sa mapya na so balas o Allah na ibgaynyan siik o luks angkoto a myamolaon.

Na gyanan na pd sii ko mga pipiya a mga galbk.

So kadaklan siiko mga Ulama na aya tindg iran na phkhisampay angkoto a mapya a galbk o wata siiko loksyan.

lagid angkoto a katharo o rasolollah s.a.w. :

( إذا مات الإنسان انقطع عمله إلا من ثلاث صدقة جارية وعلم ينتفع به وولد صالح يدعو له 
) tirmizi, corect a hadith.

Maana : Igira a myawafat so manosya na myapotoldn so mga galbkyan a pkhakanggayron a gona inontabo so tlo :

1- Sadaqa a midadayon so diiron kanggonai.

2- So Ilmo ayan a myakanggay a gona na mitatarosdn so diiron kanggonai.

3- So pangni o Wata iyan a mapya i Amal.

Na so kya aloyron a gyangkanan a Wataiyan a mapya i Amal na syaboton a so mga galbk o Wata a mga pipiya na khisampay sii ko luksyan.

Na go aya Opposite anan sadn mambo sa galbk o Wata marata na khapakay a diiron makambagian so loksyan.

Wallahu A'lam wassala'm.

-----

Kim Mayon Abdullah Muhd Rayyan Hakem,,,balasangkawon o ALLAH samadakul a mapiya na mambagian ka sii sa donya na sampay sa alongan a maori. So pman so ditadii manggasto ago ditadii ka serbesyowi ko wata ta sabap sa atas tanggongan dun oto o loks a miyatangkud.....ino mbalasan tawon o ALLAH? JAZAKALLAHU KHAIR!

Smbag :

Muhd Rayyan Hakem :

- So dii kanggastowi o mama sii ko darodopa iyan ago so mga wata iyan na nisisitaon oto.

Maana Obligation iyan oto sii dyangka a magaganyan sii ko okit a Hala'l.

A ipagizaon o Allah sa Alongan a Mawri o dinyan mipaginontolan.

----

Sopaman so Inombalasanon antawaa ka di ?

Smbag :

Oway tantoron a malai balas gi gyoto i mas taralbi sii ko langon a mga pamm-gayanyan ko mga taw.

Mga dalil :

Phitharo o rasolollah s.a.w. :

( (( دينار أنفقته في سبيل الله ، ودينار أنفقته في رقبة ، ودينار تصدقت به على مسكين ، ودينار أنفقته على أهلك ، أعظمها أجر الذي أنفقته على أهلك )) رواه مسلم

Maana : So dinar a pinggastongka sa lalan sii ko Allah, go so dinar a pinggastongka sa para inimaradika sa oripn, go so dinar a inzadqangka sa misken, go so dinar a phinggastongka siiko familingka, na aya pinaka taralbi roo i balas na so phinggastongka sii ko familingka.

Ikadwa a dalil :

Phitharo o rasolollah s.a.w. :

( ( أفضل دينار ينفقه الرجل دينار ينفقه على عياله ، ودينار ينفقه على دابته في سبيل الله ، ودينار ينفقه على أصحابه في سبيل الله )) رواه مسلم

Maana : Aya tarlbi a dinar na so diing gastoon o mama na so dinar a diinyan gastoon sii ko familiyanyan, go so dinar a diinyan gastoon para sii ko pangangayamnyan a iphagatin sa battle, go so diinyan gastoon sii ko mga pdyan sii ko Jihad sa lalan sii ko Allah a langon a anan para sii ko Allah.

Ikatlo a dalil :

Phitharo o rasolollah s.a.w. 

( ( وإنك لن تنفق نفقة تبتغي بها وجه الله إلا أجرت بها ، حتى ما تجعل في فيَ امرأتك )) متفق عليه

Maana : Go Mataan a dadan a bangka dii manggasto a gasto a para tontot sii ko balas o Allah inonta na balasangkawn o Allah, taman sii ko phmbalowinka a para sii ko darodopa aka.

----

Gyanan i mga dalil sa tanto a kalai balas o dii kanggastowi sii ko familiya apyapn Obligatory odi na Wa'jib so kanggastowi kiran.

Wassla'm.

" KOKOMAN O KAPANGFAKE SA KARATAS PARA SA GALBK "

Pakaiza e Layok A. Khasarigan :

assalamolaikom... pakaiza.. antonai kokoman o miyamasa ko sa certificate sa recto para anako makasoled ko galebek a daa katawi ko ron? so khakowa ko ron a pirak ino halal raken go so pamilya ko? balasang kano o Allah sa madakel a mapiya.

-------

Smbag :

Muhd Rayyan Hakem ;

Wa alykom slm w w.

Paganyron na mapaka phmbida anan sa kokoman.

So kyapamasanyan sa karatas fake para makanggalbk sa galbk na kapangakal oto ko diinyan galbkan.

Na madudosa roo sa mala a dusa, pdoto sii ko mga kabairol jono'b.

Phitharo o Allah : ( فَاجْتَنِبُوا الرِّجْسَ مِنَ الْأَوْثَانِ وَاجْتَنِبُوا قَوْلَ الزُّورِ ) soratol Hajj 30.

Maana : Pilaknyo na go pakawataninyo so mga rrjik a pd sa mga barahala, na go pananggilainyo na go awatanyo so katharo sa kapangakal.

Na amay ko dnyampn katawan so galbkyan ka na dinyan miphnggolalan so sanganyan ka dinyan katawan na dusapn oto ka malalamyan so company a diinyan galbkan.

Na o magaganyan so galbkyan sa mapya a diinyanon kapakanggalbk na ayabo a dusanyan na gyangkoto a paganay a kyapangakalyan.

Sopman so pantag sii ko phkhasokatyan roo na so sabaad na khapakay a kokomn iran anan sa HARA'M.

Aya mambo a Qaidah na soranga a gyanan a mya aloy.

( إن الخدعة والغس منهي عنه ، والنهي يقتضي الفساد )

Maana : Mataan a so kapangakal na go kapamaltik na isasapar anan, na so isasapar na aya ondasyan na binasa, maana di khapaka, di Hala'l.

Tindg anan o mga Ma'liyya.

Ogaid na so tindg o kadaklan ko Ulamah na khapakay oto maan Hala'l.

( فإنّ فساد العقد في التعاقد لا يستلزم دائما فساد المعقود عليه )

Maana : Mataan a so kabibinasa o dii kaphasada na go so diron kapapakaya, na ba gyotodn i lalayon a kokoman o kyphasadaan sa ba di khapay mambo a dataryan.

Gyanan i tindg o kadaklan ko mga Ima'm

So Abo hanifah so Sha'fee so Ahmad.

Na sii tano maka aayon sa so taw a dinyan katawan so galbk na HARA'M oba phpang fake sa mga karatas.

Na so pman so katawanyan so galbk ka khapakay a myapasadyampn oto a phyor ogaid na daa diplomanyan a phyor na roo na o khaiwasi na mapyadn so di kaphphamaltik o taw.

Na opaman o minibolog na asar ka magaganyan na thawbat sii ko Allah.

Wallahu A'lam.

" KOKOMAN O KANDUA' A JAMA'EH KO KATIBAW "

Pakaiza i Samroding Gao Dica :

Salam aden a pakaiza ame saya ko mga guro ame.badikapakay so kanduwaa sa jamaah ko aden a miyatay ron balasangkano o allah sa mapya ??

----

Smbag :

Muhd Rayyan Hakem ;

Wa alaykom slm w w.

Gyangkanan a pakaiza na aya Marayag a phzabotnon na tomitibaw sii ko torogan a piriparado angkanan a mga taw a phndowaa.

Na o gyanan i pakaiza na di anan khapakay oba siran du'a sa jama'eh.

da a dalil na go da mawarad sii ko mga Ulamah o mga Ahlu sunna oba iran anan pyakay.

So hadiths a katharo o rasolollah s.a.w. a :

( اسْتَغْفِرُوا لأَخِيكُمْ ، وَسَلُوا لَهُ بِالتَّثْبِيتِ ، فَإِنَّهُ الآنَ يُسْأَلُ ) abo da'wd correct a hadiths.

Maana : pangninyodn sa rila so pagarinyo, na pangnikano sa ko Allah sa pakathiknaanyan, ka mataan a Imanto na phagizaan skanyan " o dwa a mga mala'ikat ".

Na sii anan sii ko kapasad o kinilbngnon. a matitimo siran.

Na apya san na dowa a katharo san o mga Ulamah a mga Salaf :

_ Si Shaikh ibn ba'z r.t. na tigyan a khapakay a mamangni so Isa kiran sangkanan a oras na phaminn mambo o mga pd a domadaramba.

Datar o aya marayagpn sii ko katharo iyan na kailangan na knaba siran mimbibitiyarai sa minili siran sa paka phndowaan, ka myan-g iran badn so isa a diin dua' na gyoto a phagaminn iran.

Na basiran phmbibitiyarai daan na dapn oto mapay sangkanan a mala shaikh.

Aya dalil a tigyan na gyangkanan a Hadiths a myaaloy.

_ Sipaman si Shaikh Sa'lih Al-Uthaimen r.t. na tigyan a di khapakay oba siran du'a sa jama'eh ka daanan a dalil a ba anan khapakay.

Gyanan a tigyan a Hadiths a mya aloy na daon maaloy oba phnjama siran na phndua siran.

Aya maana nyan na oman i isa kiran sangkanan a masa na iphamangninyan sa rila na go kapakathikna so pagarinyan sa skanyambo.

Maana oman i isa na phangni.

= Samanan na so sktanoron na apya anda sa dwa anan na palayatanoron maayon. ditano pagongkirn so oman i isa kiran ka palaya mabagr so ijtihadyan.

---

Gyanan pman a paka iza na myasmbagdn sa puro a sabap ko kna oba sii anan ko kobor ka so tomitibaw na aya phangni na daa dalil sa ba anan khapakay.

Sabap roo na Sii tano romaramig sii ko kababaloy anan a di khapakay.

Wallahu A'lam.

" KOKOMAN O KANGGAWIINI SII KO MYATAY "

Pakaiza e Bil LGates Abdul :

PHAKA-ISA Antonaa so kang gawi-i ko tao igira mindod ko limo o Allah,oba haram sa Islam so kang gawi-i o knaba?

-----

Smbag :

Muhd Rayyan Hakem ;

Wa alykm slm w w.

Kataya so pagilain sangkai a pakaiza a pagaritano balasan o Allah sa mapya ko pakaiza iyan ka an phkhaththan so thitho a kokoman o Agamatano a Islam.

-Ino so kanggawii adn a paka asalyan sii ko Islam ?

- Antonaa i mapipikir o diinyan gawiinan so myawafat simba oto antawaa ka di ?

- Opama ka khapakay na antonaa i dalil sa kakhapakaynyan ? na o di khapkay na inobs oto na go antonaa mambo i dalil sa di khapakay ??

----

Smbag :

So kanggawii sii ko kalalayamiron o mga taw sa pilipinas na da a ba anan pakaasal sii ko Islam a banyan kayanggola ola, iphoon ko sii ko masa o Nabi s.a.w. na taman sii ko phmbthowan sa tlo a Qro'n Al-Mufaddalah.

A gyanan i mga masa a mga pipiya sii ko Islam ko kyatharo awn o rasolollah s.a.w. : ( خير كم قرني ثمّ الذين يلونهم ثمّ الذين يلونهم ) bokhari.

Maana : Aya mapya a Masa na so masa akn a tigo rasolollah s.a.w. oryanyan na so talondogon oryanyan na so talondogon.

Na mya pasad a gyangkanan a masa a tlo na dadn a ba mya panothol sii ko mga Ala a mga Ulamah sii sangkanan a masa oba minggola ola sangkai a phmbthowan sa KANGGAWII.

Samawto na marayag a daa paka asal o KANGGAWIINI sii ko myawafat.

_ Sopman so Antonaa i ikhidia ko myawaafat a muslim a kabnaryan a minggolalanon ? 

= Na aya smba anan na ipnggolalanon so phmbthowan sa TAZHEEJOL MAYYT a 4 pat timan :

1- prigoon sa mapya.

2- khapann sa mapya.

3- Zambayangan.

4- Ikhobor sa mapya.

Na oryan anan na BA ADN A BAYADANYAN NA WAJIB A KABAYADAN. then Ba adn a inithanan iyan na kailangan a mitoman.

Oryan anan na myapasad so kabnar o Myawafat a Muslim.

_ Gyanan pman a KAPMIATAY na mya aloy tano a daa paka asalyan sii ko Islam.

Aya Mataan a bnar na Siinan Myakowa a adat sii ko Mga Cristian, a igira a adn a myatay kiran na diiran gawiinan.

Na so Nabi s.a.w. na Inisaparyan ko mga Ummatyan oba iran phzonggiringi so mga ridoay iran a masosopakyan so Islam :

( من تشبّه بقوم فهو منهم ) Abo da'wd.

Maana : Sa Taw a pananayanyan so mga pagtaw na pd kiran.

-----------

Opaman oba aya mapipikir o DIING GAWII NA KAZADKA OTO na so kazadqa na Iba'dah SIMBA na so simba na WAJIB A MISONGKAD KO INIKIDIAWN O RASOLOLLAH S.A.W.

Sabap san na o gyanan i Niaton o dii ron Golaola na myaka sold sii ko Phmbthowan sa BID'AH.

Kagya simba oto a myambago a knaba di khagaga nggola ola o rasolollah a goso mga Sahabah ka daa bakiran makaarn sa kazowaawn ogaid na dairan sowaa na nanao sa gyanan na BID'AH a myambago sii ko Islam.

Na aya katharo o rasolollah s.a.w. :

( من عمل عملا ليس عليه أمرنا فهو ردّ ) bokhari.

Maana : Sadn sa taw a galbk sa galbk a simba a daa ba amiron sogoan na sabnar a phakandodon. ( maana ; diron khatarima ).

Aya mataan na barondn myadusa, daron balasi! 

- Antonai sabap ???

Na kagya a so kambabagowi sii ko Islam sa diron pd na dowa dowa a maana nyan :

1- So rasolollah na tiraidoryan so mga Ummatyan ka adn a mapya a Okit sii ko kapmiyatay na danyan kiran pakarayaga.

Na tanto anan a piligro ka miniropanyan so rasolollah s.a.w. sa tridor na ay taman a kala anan a dusa sii ko Allah.

Phitharo o rasolollah s.a.w. :

( إِنَّهُ لَمْ يَكُنْ نَبِىٌّ قَبْلِى إِلاَّ كَانَ حَقًّا عَلَيْهِ أَنْ يَدُلَّ أُمَّتَهُ عَلَى خَيْرِ مَا يَعْلَمُهُ لَهُمْ وَيُنْذِرَهُمْ شَرَّ مَا يَعْلَمُهُ لَهُمْ ) bokhari.

Maana : Mataan a daa mya adn a nabi ko onaan akn inonta na kabnar kiran so kanggonanaowanyan sii ko mga pagtawnyan sii ko katawanyan a Mapya kiran, na go kapaki iktiyarinyan kiran sii ko phoon ko katawanyan a marata kiran. ( na da a datar o nabi s.a.w. na malai awida akal sii ko kapyaan o mga Ummatyan ).

Na ay gda akasan ino mgaday mithridor so nabi s.a.w. ??

2- So rasolollah na danyan macompleto so Islam ka adn a okit a KANGGAWII A MAPYA na danyan maosay na go danyan minggolalan go danyan misogo a knabanyan pman di khagaga .

Na isapaman anan ka Mala a tanto a Dusa kagya katharo o Allah na :

(الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي ) soratol ma'idah 3.

Maana : Imanto a gawii na kyompleto akn rkano so Agamanyo na go tyarotop akn rkano so limo akn.

Sii anan sii ko mori poro Hajj o Nabi s.a.w. na ron initoron sii sa Arafa na oryan o 88 days na khawafat so Nabi s.a.w.

Na ay gda aka a aya kapipikirangkawn na so kanggawii na pd sii ko islam na daon mikomleto ko masa o Nabi s.a.w. di ayadn a myapaka pamokhag ka na so Allah a go so Rasolollah s.a.w.

Na ay kala pman anan a dusa sii ko Allah ??

-----

Samanan na marayag a tanto a so kanggawii a phlmbaan so torogan na phphaganaan so mga taw na 3 days 7 days.

Playa anan di khapakay sii ko Islam a makarorompak sa mga dalil ogaid na so madodonya sii ko sabaad ko mga Ulamah na phndimpisaan irampn so ribat sabap ko kaoonotiron o baya a ginawa.

Odi na kaito a knal sii ko Islam, na phphakadadag sa madakl a taw, na so Allah i matao kiran.

-----

Madakl so mga Undas a di mga pipiya o KAPMYATAY ogaid na ditanodn osayn ka aya importanti na myaka rayag so kokoman O Agamatano na sii rkano anan myaromag a bayabaya .

Ayanyo khowan so Rk o Islam antawaa ka so miniganat rka o mga Luks ka a kanggawii ??

tanodan a so muslim na aya thitho a WAJIBON na maka phantag so kabaya o Allah ago so kabaya o salakawron na ayanyan phanalogphaan na so kabayaon o kadnanyan a rabbol A'lameen.

Wassala'm.