BA PIYAKAY O IMA'M AL SHA'FII SO KAPMAWLIDAN NABI S.A.W. ???

-----------------------------------------------------------*------------*-----------*---------heart emoticon

Sktano a mga Ahlu Sunnah wal jamaah na ditano tharimaan oba so ima'm Al Shafii r.t. go so salakaw ron sii ko mga Ima'm a pat kataw na bairan piyakay nago bairan biyaloy a tanto a mala a sim
ba so kapmawlidan nabi s.a.w. sabap ko marayag a da nggalbka o rasolollah s.a.w. go so mga Saha'bah go so mga ta'been a siran i biyantog o Allah a mga taw a thitho a maka kkdg sii ko lalan a makaoontol ago mga taw a aya diiran dii pagoradoradan na so mapiya a galbk a ikasosoat o Allah!

- Kataya so Iphndalil o mga Asha-irah go mga Soofy a kiyapakaya kon o Ima'm Al Sha'fii sii ko kapmawlidan Nabi s.a.w. go kiyabaloyaniyanon a mala a simba sii ko Allah :

( من جمع لمولد النبي - صلى الله عليه وسلم - إخوانا وهيأ طعاما وأخلى مكانا وعمل إحسانا وصار سببا لقراءة مولد الرسول بعثه الله يوم القيامة مع الصديقين والشهداء والصالحين ويكون في جنات النعيم )

Maana :

Sadn sa timooniyan sii ko masa a mawlidan nabi s.a.w. so mga pagariniyan go priparadowaniyan siran sa pangnngkn, na go tomibaba sa isisabay a darpa a paraombo, go nggalbk sa mapiya, na go mabaloy a sabap a sii ko kaphmbatiyaa sii ko mawlidan nabi s.a.w. "kinimbawataan sii ko rasol s.a.w." na oyagn skanikaniyan o Allah sii sa alongan a qiya'mah a ingpdaiyan so mga Patiis. go so mga Shaheed, go so mga Sa'liheen, na mabaloy skaniyan a sii makandarpa ko mga sorga a mga pipiya.

Subha'nallah phamliin aya ko malaa Balas!!!

Rayagan :

- Giyangkanan a katharo na khatoon sii ko kitab a :

1- I'anato Al Ta'libeen a rk i shaikh Abu Bakr Al Damya'ti Al sha'fii a soofy i Aqeeda, miyawafat ko 1302 hijri.

2- Al I'la'm bi fata'wa A'imatil Islam. a Rk i Muhammad bin Alawi Al ma'liki a soofy i Aqeeda, a miyawafat ko 1423 hijri

Tanodiniyo mga pagariya a ka giyanan a dowakataw a miyaloy ron na palaya mga Soofy so Aqeeda iran.

Ikadowa a thanodanon na si Muhammad bin Alawi na Marjayan si Abu Bakr Al Damya'ti, sii ko mga kitabiyan. Na giyanan a dowakataw na palaya sii babaling sii sa Makkah Al Mukarrama.

Na aya awida akal na zopaka siranon sa tindg o antaa i khikatharo sangkanan a katharo a imamansob ko Ima'm Al Sha'fii r.t.!

- Si Abu Bakr Al Damya'ti na phitharoiyan sangkanan a kitabiyan a miyaaloy tano sa Poro a giyanankon a katharo na aya khitatharoon na si : AL IMA'M AL YA'FII a tag a yamen, a aya apn a Aqeedaniyan na Soofy na aya kpitiyan ko maz-hab na Sha'fii. aya kinimbawataanon na sii ko 689 hijri. samawto na tiyangkd iyan a knaba anan katharo o Ima'm Al sha'fii ka aya khikatharoon na sii ima'm Al Ya'fii.

- Sipman si Muhammad bin Alawi Al Ma'liki na phitharoiyan sii sangkanan a kitabiyan a miya aloy sa poro a ayakon a mitharo sangkoto a katharo na sii ima'm al Sha'fii. sa datar o kinividionon o isa sii ko mga pagari tano a dii manolon sangkai a Kapmawlidan nabi.

Ayabadn a problema sangkoto a vedio a miya ilay tano na asar ka miyabatiya iyan so kidadaptariyan sii ko sangkoto a kitab na daniyan paki ilain so kiyapoon anan angkoto a katharo a matatago sii ko baba angkoto a na kitab na ditadn katawan o andaniyan oto kinowa a katharo.

Coment :

- Samanan na miyakazopa so palaya ulama a Soofy sangkanan a katharo, Na so isa na Marja o isaon go mas miya ona sii ko kapagilmo ko ilmo a soofy adi so isaon. Na antai pharatiyaan kiran so Marja o so Muritiyan ? Go tatanodingka a palaya anan mga Ulama a Soofy.

Pakaiza : Opama ko phiyor a katharo anan o Ima'm Al Sha'fii na antonaa ko mga kitab o Ima'm Al Sha'fii i katatagoanon ka anon mailay o phiyor? odi na antaa sii ko mga phiyor a murit o Ima'm Al Sha'fii i mitharoon sa katharo anan o Ima'm Al Sha'fii r.t. a tiyantoniyanon ka an mailay ko kitabiyan ?

- Ikadowa a mala a pagin-ngkaan sangkoto a katharo na opama ko tiyanodi niyo na miyaloy roo sa tanto a mga ala a balas o taw a phmawlidan nabi s.a.w., na kataya so kailangandn a thanodanon :

1- Opama na sangkan a kalaiyan i balas na dadn a baon miyakanggalbk ko mga sahaba, aya mala na so Rasolollah. ilayaniyoman angkoto a balasiyan ka tanto a mala na sa giyanan a kalaiyan i balas na andamanayadn i dasan katokawi o mga Sahabah a tanto mga alai panizakay sii simba ko Allah, go daa phakalpasn iran a mapiya obairan daphkhiiza ko rasolollah s.a.w.

2- So kaphagaloya ko balas a mattndo datar angkanan a miyaloy sa kathro anan na pd anan sii ko mga ilmo a migagayb a daa mataoron a rowar ko Allah go so Rasolollah s.a.w. Na di khapakay ko Apiya antaadn a Ulama odi na Ima'm a tndooniyan so balas o galbk a daa daliliyan sa Qur'an odi na Hadith. na anda miyakapoon a giyanan balas a miya Aloy san go Andai daliliyan?

3- Sabap sangkanan a kiyatndoa ko tanto mala a balas o kapmawlidan nabi s.a.w. sa daa baniyan dalil, na miyatangkd a knaba aya khikatharo san na so Ima'm Al sha'fii r.t. ka so Ima'm Al Sha'fii r.t. ino miyakilala so panagontamaniyan a miyabaloy a ima'm o mga Ahlu sunnah kagiya so kasanggila iyan ko dusa, go kakkdgiyan sa mathitho ko okit o rasolollah s.a.w. go so mga sahaba. na giyanan a katndo sa balas a daa daliliyan na mala anan a dusa sii ko Allah ka iphagangkob anan sii ko Allah ko daniyan maaloy, na makaphangimbnarka a kharawan anan tharo o imamAl Sha'fii?

4- Knba sobo so Ima'm Al sha'fii r.t. i phimbaalan o mga Ulama mga Soofy sa katharo iyan para ko kalbihan o mawlidn nabi ka apiya so mga Sahaba na phimbabaalan iran sa katharo pantag ko kalbihan o Mawlidan nabi, datar o Abu Bakr, so Umar so Uthman so Ali r.t.a. sopn so Ima'm Hasanon Bashari na adnpn a kiyambaalan o mga Soofy a katharo iyan pantag ko kalbihan o Mawlidan nabi s.a.w. ogaid na langon anan kabokhagan ka opama ko phiyor na matoon kadn siiko mga kitab o mga Ahlu sunnah kagiya tanto iran inigagt a kisorat o mga katharo o mga sahaba pantag ko mga pipiya a mga simba, na inopn dingka khatoon ko mga kitab o mga Ahlo Sunnah angkanan a mga kalbihan o kapmawlidan nabi a iniangkob ko mga sahaba go so mga ima'm ka nanao sa fabricated oto mga katharo a da a baniyan paka asal.

Note :

Ino akn aya piyaka rayag angkai a bandingan kagiya so piyaka labas a VEDIO a tiyantoron o isa sii ko mga A'lem a dii manolon sa kapmawlidan nabi. a sokon so Ima'm a Sha'fii r.t. na skaniyan i khikatharo sii sangkanan a katharo sa inismbagiyan oto ko kiyatharoa tanoron sa knaba oto katharo o Ima'm Al Sha'fii r,t. ka aya khikatharoon na so Al Yafii. Na inipostiyan so Vediona piyaki ilayniyan so kitab i Muhammad bin Alawi Al Malikia soofy, a roniyan koniwa so katharo.h

Na imanto na miyakarayag rkano a giyoto a katharo na aya miyamagalataon na langon mga Ulama a mga Soofy na minsanpn giyoto na aya mabagr a katharoon na knaba oto katharo o Ima'm Al Sha'fii ka so Imam iran a si Yafii a tag a yamen i khikatharoon.

Pangnita sii ko Allah a miyakaliwanag rktano aya mga pagariy.

BA PIYAKAY O IMA'M IBNO TAYMIYYA R.T. SO KAPMAWLIDAN NABI ???

> --------------------------------------------------------*-----------*----------*------- heart emoticon

Ino tano aya pliwanagi kagiya isa inin ko mga limpangan a phagusarn o mga panonolon sa KAPMAWLIDAN NABI s.a.w. a sokon so IMAM IBNO TAYMIYYA r.t. ago so IMAM IBNOL QAYYM r.t. na piyakay iran a dowa go piyakatana iran a adn a balas o diron diinggalbk! Tanto a tanto a mapiya na go mala!! Na dadn a ba anan kabbnar.

- KATAYA SO MGA KATHARO I IMA'M IBNO TAYAMIYYA R.T. SA KABABABALOY O KAPMAWLIDAN NABI S.A.W. A BID-AH GO DI KHAPAKAY :

Phitharo iyan :

- ( "وَأَمَّا اتِّخَاذُ مَوْسِمٍ غَيْرِ الْمَوَاسِمِ الشَّرْعِيَّةِ كَبَعْضِ لَيَالِي شَهْرِ رَبِيعٍ الْأَوَّلِ الَّتِي يُقَالُ إنَّهَا لَيْلَةُ الْمَوْلِدِ، أَوْ بَعْضُ لَيَالِي رَجَبٍ، أَوْ ثَامِنَ عَشْرَ ذِي الْحِجَّةِ، أَوْ أَوَّلُ جُمُعَةٍ مِنْ رَجَبٍ، أَوْ ثَامِنُ شَوَّالٍ الَّذِي يُسَمِّيه الْجُهَّالُ "عِيدُ الْأَبْرَارِ"، فَإِنَّهَا مِنْ الْبِدَعِ الَّتِي لَمْ يَسْتَحِبَّهَا السَّلَفُ وَلَمْ يَفْعَلُوهَا وَاَللَّهُ سُبْحَانَهُ وَتَعَالَى أَعْلَمُ )

Maana : Sadn sa taw a mbaal sa masa a tndooniyan a salakaw ko mga masa a tindo a shari'ah, datar o mga kagagawii ko Rabiel Awwal a dii tharoon a giyotokon so gagawii a Mawlid. odi na so pd mga kagagawii ko Rajab, odi na so ika sapolo a go walo ko zil hijja, odi na so paganay a Jumuah ko Rajab, odi na so Ikawalo ko Shawwal; a giyoto so phmbtowan o mga igonoranti sii ko islam sa eidol abra'r, na mataan a giyanan a miyanga aaloy langon na pd sii ko miyangambabago a dadn kababayai o mga Salaf Al-Sa'lih, go dairan anan nggalbka . ( Majmoo Fata'wa 25/298 ).

Phitharoiyampn a :

فإن هذا لم يفعله السَّلَفُ، مع قيام المقتضي له وعدم المانع منه لو كان خيرًا. ولو كان هذا خيرًا محضا، أو راجحًا لكان السلف رضي الله عنهم أحق به منا، فإنهم كانوا أشد محبة لرسول الله صلى الله عليه وسلم وتعظيمًا له منا، وهم على الخير أحرص. وإنما كمال محبته وتعظيمه في متابعته وطاعته واتباع أمره، وإحياء سنته باطنًا وظاهرًا، ونشر ما بعث به، والجهاد على ذلك بالقلب واليد واللسان. فإن هذه طريقة السابقين الأولين، من المهاجرين والأنصار، والذين اتبعوهم بإحسان

Maana : Mataan a giyanan na daanan nggalbka o mga Salaf, badi maaadn so kapaparo iran sa kinggolalan-non ka daa bakiran maka aarn opama ko aya sabot iranon na mapiyaskaniyan! Mataan a siran i pinaka phkhababaya ko Rasolollah s.a.w. na go pina somslaon go magaadaton, na go siran i pinaka masiyap sa dikiran kapakalpas o mapiya. aya mataan na aya pinaka completo a babaya rakaniyan go sla sla rkaniyan - a rasololla s.a.w.- na so kaonotiron sii ko inokitaniyan go so mga sogoaniyan, go so kaoyaga ko okitiyan sa masoln go mapayag, na go so kapakadayamanga ko nganin a sabap a kiyasogoawn a giyanan so islam, na sarta a njihad so taw sa nggolala sa puso go barokan go katharo, ka mataan a giyanan i okit o miyanga oona sii ko paganay a pd sii ko mga Muha'jireen ago mga Ansa'r ago so tomiyondog kiran sii ko mapiya. ( Iqtidao Al Sira'tal Mustaqee... 2/213-214 ).

- Samanan na miyapayag rkano a so Shaikhol Islam Ibno taymiyya r.t. na di bnar obaniyan piyakay so kapmawlidan Nabi s.a.w.

-------------------

PAKAIZA ANTONAA ANGKAI A DII THAROON A MGA PANONOLON SA KAPMAWLIDAN NABI S.A.W. A PIYAKAYSKANIYAN KON I SHAIKHOL ISLAM IBNO TAYMIYYA, ANTONAA I DALIL IRAN SAN ?

- SMBAG :

Daa ba anan kabbnar oba piyakay o Shaikhol islam so kapmawlidan Nabi s.a.w., miyabatiya iyo angkanan a mga katharo iyan sa poro pantag ko kababaloy o kapmawlidan nabi a bid-ah na dadn a basan ipagiza!

- kataya so sabap a diron dii katharoa o mga ulama a mga Soofy go mga Asha'irah a si Shaikhol Islam Ibno Taymiyya r.t. na piyakayniyan so kapmawalidan nabi s.a.w.

Iphndalil iran a giyangakanan a Katharo o Shaikh a :

فتعظيمُ المولد، واتخاذُه موسمًا، قد يفعله بعضُ الناس، ويكون له فيه أجر عظيم لحسن قصده، وتعظيمه لرسول الله صلى الله عليه وسلم، كما قدمته لك أنه يحسن من بعض الناس، ما يستقبح من المؤمن المسدد

Maana : SO dii kazla slaa ko Mawlid ago so kaphmbaloyaon a mattndo a masa, na sabnar a diyanan dii nggalbkn o sabaad sii ko mga taw! na adn a balasiyan roo sabap ko kapiya o antapiyan, go so slasla ko rasolollah s.a.w. sa datar o kini onaankn rkaon kagiya a mataan a mapiya sii ko sabaad ko mga taw so ikakagowad go marata sii ko mu'men a makatititho i okit. ( Iqtidao Sira't al Mustaqee, 2/124 ).

Samanan na omambo o Pagilayangka angkanan a popotoln a katharo sa dingka katawan sii ko paganay oba di papakaya o Shaikh so kapmawlidan Nabi s.a.w.na phakaparatiyayakadn sa mataan a skaniyan na piyakayniyan! Na giyanan i phmbthowan sa SHOBOHAT a aya kakhasabotingkawn na miprogo rogod ka sa mapiya.

> Rayagan angkanan a katharo :

- Giyanan a katharo na phitharo iyan a sii anan mapiya ko sabaad ko mga taw! Na antaoto a mga Taw?

Aya smbag na : Sii ko mga taw a diiran katawan oba di khapakay so kapmawlidan nabi s.a.w. ka tanto a mga iito i Ilmo! Aya karinaon sa giyanan i mapipikiriyanon na giyto a kiyatharoa niyanon sa : datar o kini onaankn rkaon kagiya a mataan a mapiya sii ko sabaad ko mga taw so ikakagowad go marata sii ko mu'men a makatititho i okit!

Na aya oto a mapipikiriyan ambalasanon so muslim a mayto i ilmo na so kapiya o niatiyan a sla sla go babaya ko rasolollah s.a.w., kagiya so sla sla na go babaya ko rasolollah s.a.w. na pd ko wajib sii ko muslim na go pd ko bkhaw o Aqeeda niyan, ogaid na sii oto okit a di makasopak ko Manhaj o Rasolollah s.a.w. a inigoris sa marayag o mga SALAF AL SA'LIH. na sopman galbkiyan a Bid-ah na apiya skaniyan ignoranti sii ko islam na diron mbalasan. Mbida so kambalasi ko kapiyaniyan i niat a ignoranti skaniyan ko islam, go so galbkiyan a di makasososon ko Manhaj o mga Rasolollah s.a.w.

Sopman so somasaboton na diron khapakay so lagid anan ka Bid-ah na sii rkanian na daa balas o kapiayaniyanon i niat a phithibaba iyan phzopakniyan so lalangan o islam, na samporna a dimbalasan Ko kitana o galbkiyan sabap ko giyoto na Bid-ah a sasabotniyan.

Ikadowa na giyanan a phitharo iyan a datar o kini onaan akn rkawn kagiya na aya mapipikiriyan na so inaloyniyan sii ko ( page 2/123 ) a kiyatharo niyanon sa :

Go aya mapipikirtano san na mataan so kabaloya sangkanan a Gawii a dii celebratn na Phimbago anan a daa baniyan paka asal, na dadn mabaloy so mga Salaf Al Sa'lih a pd ko mga Ahlul Bayt go so Salakaw kiran oba iran anan biyaloy a dii zelebratn ka anon mambago so mga galbk. Kagiya so mga Celebrations na Shari'ah skaniyan, na wajib a so kabaloyniyan a maka kkdg ko SUNNAH knaba phimbabago. ka so Nabi s.a.w. na Adn a mga Khotbaniyan go mga Kapasadan go Miyanganggolaola sii ko mga Gawii a madakl, datar o Gawii a Badr. go Honayn. so Khandaq, so Fat-ho Makkah, go so Gawii a Hijra, go Kiyapaka soldiyan sa Madinah, na so mga khotbaniyan na Madakl anan a phagalowiniyan so mga Onayan o Agama, na daniyan patorayn oba anan baloya a dii celebratn, ka aya mataan a disan diinggalbk na so mga Cristian a sii ko mga Gawii a adn a miya oolaolawn o Isa a.s., phmbalowin iran oto a mga celebration day, odi na so mga Yahoodi. Aya mataan na so celebration na Shari'ah skaniyan, na sa phiphakay ron o Allah na pagonotan, na di phmbagoon sii ko islam so diron pd. go datar anan so dii nggalbkn o sabaad siiko mga taw a odi oto pananayan ko mga cristian ko kaphcelebrate ko mawlid o Isa a.s. na babaya oto sii ko Nabi s.a.w. na go slaslaon, obadi so mga taw na maooparik siran siiko antonaa i phiyor gawii a kinimbawataan ko rasolollah s.a.w. go mataan a giyanan na danggalbka o mga Salaf Al-salih inangin na mapaparo siran ka daa ba kiran maka aarn ko kaphnggalbkawn, na opama ko mapiya anan, na go makalalawan, na mabaloy man so ma Salaf Al sa'lih a siran i mas malaon i kabnar sa kinggolalaniyan a di sktano, kagiya siran na aya btad iran na mitataralo angkoto a babaya iran ko rasolollah s.a.w. na go so slaslairanon a di sktano, na go siran i pinaka magiipat sa kinggolalan o mapiya a galbk. ( Iqtidao Sira'tal Mustaqeem, 2/123 ).

Saman na miyaka rayag ko dii mangdg sii ko bnar a si Shaikhol Isla'm Ibno Taymiyya r.t. na knaba bnar obaniyan piyakay so Kapmawlidan Nabi, aya mataan na inisapariyan go kiyokomiyan sa Bid-ah.

- Pdpn a kailangan a kasabotiron o dii mangdg sii ko bnar, na apyapn So Shaikhol Islam na aya saboton o mga Ulama a mga Soofy go mga Asha'irah na piyakayniyan so kapmawlidan Nabi, na dibo oto khatarima! Aya sabap na kagiya mimbabalaka o katharo iyan so katharo o Allah sa kiiyacompleto o Islam, go so kiyatharo awn o Rasolollah s.a.w. a langon o mapiya na ini pangdaoniyan sii ko mga Ummatiyan, goso kiyatharoaniyan sa so langon o phimbago na kadadagan.

Na kataya so katharo i shaikhol islam sa di khapakay oba aya tarimaa na so katharo na go pamikiran o mga mama basta a aya miphmbolangiyan na so katharo o mga Nabi ayapn oba so Allah!!!

Pitharo i Shaikhol islam Ibn Taymiyya r.t. :

معارضة أقوال الأنبياء بآراء الرجال، وتقديم ذلك عليها، هو مِن فعل المكذِّبين للرُّسل، بل هو جِماعُ كلِّ كُفرٍ ؛ فإن الله أرسل رسله، وأنزل كتبه، وبيَّن أن المتبعين لما أنزل هم أهل الهُدى والفلاح، والمعرِضين عن ذلك هم أهل الشقاء والضلال

Maana : So khiphzopakn sii ko mga katharo o mga Nabi ko mga pamikiran o mga Mama - Mlagid i A'lem antawaa ka knaba A'lem- na go so kaphphakaonaawn, na skaniyan na galbk anan o mga taw a diiran dii pakambokhagn so mga Rasol, knaba giytobo ka skaniyan na katitimoaan ko langon o ikhakafiri, ka mataan a so Allah na siyogo iyan so mga Rasol iyan, na go Initoron iyan so mga kitabiyan, na piyakarayagiyan a so mga taw a phthondog na go komkdg ko - okit o mga rasol go so mga kitab o Allah- na siran i mga taw a matotoro nago magoontong, na sopman so mga phzopak na go phthalikod ko - okit o mga rasol go so mga kitab o Allah- na sirann i mga taw a khikawiwis wisan go khikadadadag. ( Dar-o Taa'rodil Aql Wal Naql, 5/204 ).

Samanan na miyada so shobahat a phphakalangkapn angkai mga panonolon sa KAPMAWLIDAN NABI a so Shaikhol Isla'm Ibno Taymiyyah r.t. na piyakay niyan so KAPMAWLIDAN NABI!

-------------

> SOPMAN SO MAKAPANTAG KO KATHARO IRAN A SO IMA'M IBNOL QAYYM R.T. NA PIYAKANIYAN SO KAPMAWLIDAN NABI S.A.W. NA KATAYA SO RAYAGAN ANAN :

Aya iphndalil iran a sa kaphthantowa iran sa so IMA'M IBNOL QAYYM r.t. na piyakayniyan so KAPMAWLIDAN NABI na giyangkai a khaolay a sii kon aya matatago sii ko kitabiyan a IDRA'JO AL SA'LIKEEN :

الاستماع إلى صوت حسن في احتفالات المولد النبوي أو أية مناسبة دينية أخرى في تاريخنا لهو مما يدخل الطمأنينة إلى القلوب ويعطي السامع نوراً من النبي صلى الله عليه وسلم ,إلى قلبه ويسقيه مزيداً من العين المحمدية

Maana : So kapamamakin-g sa Lagam a mapiya sii ko masa a dii kazileberate sa MAWLIDAN NABAWI na go so apiya antonaa a kalilimod a kaagamai a salakawsan sii ko tnday o thotholan rktano na sabnar a skaniyan na maphphakasoldiyan so karrnk sii ko mga puso, go phkhabganiyan so dii mamamakin-g sa sindaw a phoon ko Muhammad s.a.w. a phkhatago sii ko puso iyan na maphphakainom iyan sa makalalawan a phoon sii ko paridi a Muhammadiya. ( Idra'jo Al Sa'likeen, page 498 ).

- Giyanan i iphndalil iran sa so IMA'M IBNOL QAYYM R.T. na piyakayniyan so KAPMAWLIDAN NABI S.A.W.

Na kataya so Thanodan sangkanan a miya aloy a katharo :

1- Miyaka pira akn marepet matiya angkanan a kitab a MADA'RIJO AL SA'LIKEEN na daaknodn matoon angkanan a katharo. Go Giyanan a page a tatagoonon na daondn anan. Go Iniliyakn so mga Kitab a pd i IMA'M IBNOL QAYYM r.t. kagiya tigakn a banda sii ko mga pd a mga kitabiyan na ron anan miya aloy na dadn a kayatoonan aknon ko mga KITABAIYAN.

2- Ikadowa na giyangkanan a Okita katharo na knaba anan katharo a AHLU SUNNAH ka katharo anan a SOOFY! Datar agiyota a kiyatharoaniyanon sa ( sabnar a skaniyan na maphphakasoldiyan so karrnk sii ko mga puso, go phkhabganiyan so dii mamamakin-g sa sindaw a phoon ko Muhammad s.a.w. a phkhatago sii ko puso iyan na maphphakainom iyan sa makalalawan a phoon sii ko paridi a Muhammadiya )! Giyangkai a kpit a datar aya na knaba aya kpit a AHLU SUNNAH ka so mga SOOFY i khikpit saya.

> Samanan pagariya na miyatangkd a giyanan a katharo na knaba phiyor a katharo o IMA'M IBNOL QAYYM R.T. ka fabricated anan a katharo a phimbaalan o mga SOOFY a ini angkob ko IMA'M IBNOL QAYYM R.T. na kinowa pman a dalil o mga panonolon sa Kapmawlidan Nabi a mga ASH'IRAH.

Na sabap ko giyangkai a mga ASHA-IRAH imanto na apiya so mga Fabricated a mga katharo a diimbabalan o mga SOOFY na phkhowaan iran a mga DALIL iran sii ko kapapakaya iran ko KAPMAWLIDAN NABI na khapakay a idalil irampn a so pat a khaleefa ; so ABU BAKR go so UMAR go so UTHMA'N go so ALI, pd kiran so IMA'M HASANOL BASHARI na piyakay iran so KAPMAWLEDAN NABI S.A.W. sabap sa so isa sii ko mga Ulama o mga SOOFY asi Ibn Hajr Al Haythami na mimbaal sa mga fabricated a mga katharo a iaanglobiyan sangkanan a 5 kataw ko mga IMA'M o AHLU SUNNAH WAL JAMAA a inaloy tano, go adnpn a mga pd anan a mga fabricated a phimbabaalan iran a iphgangkob ko mga Ala Imam o mga Muslim ka iphmbagr iran oto ko kptiran a makasisilay. Ogaid Alhamdulillah ka so langon o mga katharo a phiyor a makapopoon sii ko mga Ima'm go mga Ulama o Ahlu Sunna Wal Jamaa na masisiyap anan sii ko mga kitab a mga o Ahlu Sunnah.

Phangniin akn sii ko Allah a liwanaganiyan so puso o mga taw a phkhaakal angkai a mga panonolon ko kadadagan, sa matoon iran so Untol, na ron siran masamporna sa mipagpdatano siran sii ko AQEEDA o mga SALAF AL SA'LIH.

Allahumma A'meen.

SO RAYAGAN O ( AL TAFWEED go so AL TA'OWEEL )

*----------------------------------- * heart emoticon * ----------------------------------*

Giyangkai a Bandingan na importanti aya ka an katokawi phiyapiya o mga tao a dii mangdg sa bnar so katantowan mapipikir o mga SALAF AL SALIH sii sangkanan a ( AL TAFWEED go AL TA'OWEEL ) !

Aya Mala a pliwanagan tano Saya na kailangan na kasabotaniyo a giyanan a ( AL TAFWEED go AL TA'OWEEL ) na mbida so Saboton na go mapipikiranon o mga SALAF AL SALIH ko kapapayagiyan ko mga Ulama o AHLU SUNNAH WAL JAMAAH Datar o Pat 4 a IMA'M ( ABU HANIFAH, MA'LIK, SHA'FII, AHMAD ) go so Salakaw kiran, Ago so Saboton na go pamikiranon o mga AHLUL KALAM ko kapapayagiyan ko mga MU'TAZILA go so mga ASHA'IRAH go so mga MATORIDIYYA!

Giyangkai Discuss na sii manonompang sii ko mga SIFAT O ALLAH A MGA POPORO!

--------

Paganayron na giyanan a : AL TAFWEED.

Antonaa i Maana a ; AL TAFWEED ?

> Aya Maana a ; AL TAFWEED na : kindodn sii ko katawi sii ko Shay' sii kabaya o taw a pagndodaniyanon, sa diniyan phzoldan o antonai mapipikiron na go mapmamaana niiyan.

Samanan na kiyasabot ka pagariya so Maana a AL TAFWEED ko maana niyan.

Na sii ko Aqeeda a AL TAFWEED sii ko mga SIFAT O ALLAH na miyakambidasan sa Panarima so mga SALAF AL SA'LIH , AHULU SUNNAH WAL JAMMA ago so mga AHLUL KALA'M! a mga MU'TAZILA go mga ASHA'IRAH go mga MA'TORIDIYYA!

- Sii ko mga SALAF AL SA'LIH ko kapapayagiyan ko mga ULAMA o " AHLU SUNNAH WAL JAMAA", na aya IFTHAFOWEED IRAN na so katawi sii ROPAAN o mga SIFAT o ALLAH.

- Siipman ko mga AHLUL KALA'M, a mga MU'TAZILA go mga ASHA'IRAH go mga MA'TORIDIYYA ; na aya IFTHAFOWEED IRAN na so katawi sii ko maana o mga SIFAT o ALLAH, igra manoto a daa okit a kakhagaga iran sa kapakasilaya iran ko maana niyan, odi na apiyapn khagaga iran maka silay na so sabaad kiran na diniyan phakasilain ka IPHTHAFOWEED iran so katawi sii ko maana niyan.

Aya ibaratan anan na so SIFAT o ALLAH a ( يدين - Mbala a Lima ), so mga SALAF AL SALIH na phiyakathana iran anan sii ko Maana niyan a marayag, sa datariyan mambo so mga Ulama o AHLU SUNNAH WAL JAMAA, sa tiyanto iran anan sii ko ALLAH sii ko kadadaitiyan sii ko Allah,na INITHAPOWEED iran sii ko Allah so ropaaniyan, kagiya so Za't o Allah na knaba datar o Za't o kaadniyan , na so mambo so mga SIFATIYAN na knaba datar o mga SIFAT o mga KAADNIYAN.

Na so mga AHLUL KALA'M na giyangkanan a SAFAT o ALLAH a ( يدين - Mbala a Lima ) na dowa a kpitirinon!
So mga pd kiran na piyaka silay niyan so maana o angkanan a SIFAT o ALLAH a Mbala a Lima, sa aya ini pmaana iranon na BAGR.

Na sopman so Sabaad kiran na diniyan anan phmaanaan sa diniyan dii tharoon a SOBO SO ALLAH I MATAO KO MAANA ANAN! na giyanan i TAWEED ko mga AHLUL KALA'M, a sodn so maana o mga pd ko mga SIFAT o ALLAH na aya irandn INITHAFWEED.

Samanan na miyakarayag rka pagariko Imbidaan sa panarimo o mga SALAF AL SA'LIH ko kapapayagiyan ko mga ULAMA o " AHLU SUNNAH WAL JAMAA, a go so panarima on Mambo o mga AHLU KALA'M ko kapapayagiyan ko mga MU'TAZILA go mga ASHA'IRAH go mga MA'TORIDIYYA.

- Na kataya so thanodan kawn pagari ko a sa kariribat angkanan a panarima o sa TAFWEED o mga AHLUL KALA'M !

So Allah na initoroniyan so Qur-an sa dadn a lawaniyan a karayag na go kasagogod so nganin a matatagoon a mga sogoan a madadalmon, ka an kasaboti phiyapiya o mga muslim ka aniran manggda gda so madadalmon a mga A'ya't o Allah ka aniran minggolalan sa tarotop so kabaya o Allah!

Oriyaniyan na miyaka oma so mga AHLUL KALA'M a mga MUFAWWEDA na tigiran a daa matao go daa phakasabot ko maana angkanan a katharo inontabo so Allah.

Na anda miyatago so katharo o Allah a :

( إِنَّا أَنزَلْنَاهُ قُرْآنًا عَرَبِيًّا لَّعَلَّكُمْ تَعْقِلُونَ ) sorato yusop 2.

Maana : Mataan a skami na initoron ami skaniyan a Qur-an sa basa a Arab ka aniyo kasaboti na go mindal dalm.

Sabap san na phitharo i IMA'M IBN ABD BAR AL MA'LIKI a : So mga AHLU SUNNAH na maoompong siran sa kaphagikrara ko mga sifat o Allah a matatago sii ko Qur-an go Sunnah, na go so kaproranawn ko phiyor a maana niyan, knaba Maja'j, ogaid na siran na diiran ipropa so ropaan o mga Sifat o Allah ka IFTHAFWEED iran anan sii ko Allah. ( Al Olo lil Ali Al Gaffa'r, page 250 ).

----------------------

Sopman so AL TA'OWEEL :

> Aya maana AL TAOWEEL na : So Katantowan o Shay, go so Zndadaniyan, odi na so Osayaniyan go so Rayaganiyan.

Giyangnan i Maana A TAOWEEL sii ko LITTERAL na so mga SALAF AL SA'LIH na giyanan i maana kiran a TA'OWEEL :

1- So KATANTOWAN O KATHARO ' go so ZNDADANIYAN.

2- So OSAYAN O KATHARO go so RAYAGANIYAN.

Kataya so pd ko mga Dalil anan :

- Phitharo o Allah pantag ko dii kapakambokhaga o mga ka'fir ko alongan a mawiri :

( هَلْ يَنْظُرُونَ إِلَّا تَأْوِيلَهُ ۚ يَوْمَ يَأْتِي تَأْوِيلُهُ يَقُولُ الَّذِينَ نَسُوهُ مِنْ قَبْلُ قَدْ جَاءَتْ رُسُلُ رَبِّنَا بِالْحَقِّ ) Al A'ra'f 53.

Maana : Ba adn a Nanayaon iran a rowar ko KATANTOWANIYAN, na sii ko gawii a ithalingoma so KATANTOWANIYAN na matharo o siran oto a linipataniran skaniyan ko miyaona sa doniya a sabnar a minitalingoma o mga sogo o kadnan ami so bnar .

Sangkanan a A'yat na aya maana a o TA'OWEEL na : KATANTOWAN.

Go phitharopn o Allah sa minggolalan ko yusop a.s. :

( وَقَالَ يَا أَبَتِ هَذَا تَأْوِيلُ رُؤْيَايَ مِنْ قَبْلُ قَدْ جَعَلَهَا رَبِّي حَقًّا ) Yusop 100.

Maana : Go phitharo o Yusop ki Amaiyan a Hay Ama akn na giyaya i KATANTOWAN go SNDADAN o taginpn akn ko miyaoni na sabnar a tiyoman o kadnan akn.

Aya manana san so AL TA'OWEEL na : KATANTOWAN go SNDADAN.

Phitharo o Rasolollah s.a.w. ko kinipangnin iyan sii ko Ibn Abba's r.a. sa kamapiya an a :

( اللهم فقهه في الدين وعلمه التأويل ) Bokhari @ Muslim.

Maana : Ya Alla na pakisaboting kawn so Agama na go pangdaon kawn so Osayan na go Rayagan. - o Qur-an Go Sunnah- odi na so Agama.

Sa gyanan a Hadith na aya Maana a TA'OWEEL na : OSAYAN go RAYAGAN.

- Na giyanan i Sabot o mga SALAF AL SA'LIH ko maana a TA'OWEEL.

Oriyan Anan na miyaka Oma so mga AHLUL KALAM na salakaw a Sabot iran sii ko maana o TA'OWEEL ka aya maana niyan kiran na :

KAPAGALINA KO MARAYAG A MAANA KO KATHARO SII KO MALOON A MAKA SASALONG SA PHNGGOLALAN SA DALIL NA GO KARINA.

Na giyanan bago i inipmaana iran sii ko AL TAOWEEL na asar ka phiyor a adn a dalil iyan na inayonan siranon o mga Ulama o AHLU SUNNAH wal JAMAA.

Na aya miyabaloy a Awida Akal na so mga AHLUL KALA'M na biyaloy iran anan a dalil sa kaphphamakasilaya iran sii ko mga maana o mga SIFAT o Allah.

Aya phmbalowin iran a Dalil iran sa kaphphamakasilayaon na so mga AKAL IRAN.
Knaba so Qur-an ago so Sunnah.

Na Sabap san na so mga Ulama a mga AHLU SUNNAH na aya iphmbotho iran sii ko iphndalil angkanan a mga AHLUL KALA'M ko kapapayag iyan ko mga MU'TAZILA go so ASHA'IRAH go mga MA'TORIDIYYA. Dalil anan a WAHMI, ka siibo ko mga pamikiran iran knaba phoon sii ko Qur-an go SUNNAH.

> Isa a Mala a Thanodan o Muslim na so mga SALAF AL SA'LIH go so mga AHLUL KALA'M ko kapapayag iyan ko mga MU'TAZILA go so ASHA'IRAH go mga MA'TORIDIYYA na mbida siran sa pasodan ko panarima odi na AQEEDA.

so mga AHLU SUNNAH na aya pasodan iran sii ko AQEEDA na so : QUR-AN go so SUNNAH ko saboton o mga SALAF AL SA'LIH.

na so mga AHLUL KALA'M ko kapapayag iyan ko mga MU'TAZILA go so ASHA'IRAH go mga MA'TORIDIYYA, na aya pasodan iran sii ko AQEEDA na so : AKAL then so QUR-AN then so SUNNAH.

Aya paka oonaan o mga AHLUL KALAM na so mga AKAL IRAN a di so QUR-AN ago SUNNAH. datardn anan so kini ropaanon o isa sii ko mga IMA'M o ASHA'IRA asi FAKHRODDEN AL RA'JI ko phimbaalaniyan a QA'IDA a bithowaniyan sa AL QA'NO'N AL KOLLI. ( Asa'so Al Taqdees, pege 172-173 ).

Sabap san na miyakasilay siran phoon ko MANHAJ a HAQQ a giyanan so MANHAJ o mga SALAF AL SA'LIH ko kapapayag iyan ko mga IMA'M go mga ULAMA o AHLU SUNNAH WAL JAMAA.

Wallahul Muwwiq.

SO KAPAKASISILAY O PANARIMA O MGA SOOFY " SOOFISM"

(>0----------------------*---------------♥-----------------*-----------------------0<)

Inotano aya mbgi sa makampt a Osayan ka madakl o mga Pagari tano a piyangni niyan rakn a likasawan tano o inoto makasisilay so mga SOOFISM or SOOFY! Antonaa i kasasabapan sa diron dii katharoa sa makasisilay so Aqeeda iran, ka masosopakiran so MANHAJ a minitalingoma o Rasulollah s.a.w. a phoon sii ko Allah?

KATAYA SO SABAAD KO LIWANAGAN ANGKAI A BANDINGAN :

Kailangan na katatanodan ka lalayon a so mga SALAF AL SA'LIH na aya pasodan iran sii ko AQEEDA na so ; QUR-AN ago SUNNAH, na da a salakaw sa dowa anan.

1- So mga SOOFISM na aya pasodan iran sii ko AQEEDA na so AL KASHF , na go bo so AL AQL, na gobo so QUR-AN go SUNNAH.

So Maana a AL KASHF : skaniyan so kaphkhatokawi o SOOFY sii ko nganin a migagayb! sa phkhailayniyan odi na iphagilahamon a phoon ko Allah sa diritso odi na diinggolalan sa ilham a malaikah.

Phitharo o isa sii ko mga Ima'm a SOOFY a si AL IMA'M AL GAZZA'LI r.t. :
Go Datariyanpn a Sabnar phzambr so ndo a mga iinano na phkhasawaan so rnding phoon ko mga Mata o mga Puso na phphakarayag sii rkaniyan so pd a nganin a midadakat ko Lawhol Mahfoodh - giyanan so daptaran ko langon o mga okoran o Allah ko mga kaadn- . ( Ihiya' Olo'moddeen 3/19 ).

Go phitharo i Abdul Kareem Al Jeely a isa sii ko mga Aqta'b o mga SOOFY a : Sabnar a Piyakambkn akn a kitab akn aya " Al Insa'n Al ka'mil" sii ko KASHF a marayag, na inisogo rakn o HAQQ ( ALLAH ) So kapayagaon ko mga rarayagon go so mga liligodon. ( Al Insa'nol Ka'mil, page 5 ).

NOTE : Samanan na miyaka rayag a mataan a so mga SOOFY na aya babalowin iran a phyor a pasodan iran sii ko AQEEDA iran na so AL KASHAF a giyoto so diritso a Ilaham kiran o Allah odi na minggolalan sa mala'ikat, sa knaba iran aya phagilaya na go phagonoti na so matatago sii ko QUR-AN ago so SUNNAH.

Na Ba adnpn a lawan a kapakasilay go kadadagan o mga taw a inipilak iran so QUR-AN go SUNNAH ka salakaw a piyanalogphaan iran a pasodan iran.

Phitharo o Rasulollah s.a.w. :

Hay mga taw! Sabnar a Inibagak akn rkano so opama ko ikhotaiyo na go iplinding iyo siran na dikanodn makasilay na go madadag sa dayon sa dayon ! So KITAB O ALLAH go so SUNNAT AKN. ( Al Ha'kim a phoon ko Ibno Abba's, hasan ).

Na aya soranga a giyanan a katharo o Rasulollah s.a.w. na sadn sa taw a ipilakiyan a dowa anan ka salakaw a balowiniyan a pasodan na sigoradodn a miyadadag skaniyan na go miiyaka silay.

Na giyana a phmbthowan sa AL KASHF sii ko mga SOOFISM na madakl i barangan so kaphphakaokityan na ditanodn pagosayn ka tanto a phakatas, aya importanti na siyabotiyo i maana a AL KASHF a giyana onayan a paganay na go pasodan o mga SOOFISM.

---------------------

2- Aya Aqeeda o mga SOOFISM sii ko Allah na so Allah na phndarpa skaniyan sii ko lawas o maporo a SOOFY! maana phzolk so Allah sii ko lawas o SOOFY. giyanan i phmbthowan sa AL HOLO'L.

Knaba sambo taman ka phkhisampay so AQEEDA iran sa so langowan a phkhailay sa doniya na skaniyan so ALLAH. giyanan phmbthowan sa WIHDATOL OJO'D.

3- Aya AQEEDA o mga SOOFY sii ko mga NABI na phkhisampay siran sii ko pangkatan a daron misampay so pangkatan o mga NABI !

Phitharo i Abi Yazeed Al Basta'mi a isa sii ko mga OLOWAN a SOOFISM a :
( Siyosaw ami so ragat na so mga Nabi na bairandn matitindg so kilidiyan ) Al Majmo'atol Ka'mil 1/49. Aya maana anan na kiyalawan iran so mga NABI sa kapasang sii ko langowan taman.

3- So mga SOOFISM na isa a okit a simba iran sii ko Allah na so KAZAYAW , balabawron igira a MAWLIDAN NABI. na disiran dii mamagidaida rakhs a dii zayawan so IDAYDA, na tanto kiran oto a mala a Simba sii ko Allah.

4- So Mga SOOFISM na adn a sndadan o panagontaman iran a diiran dii panamaran a misampay siranon a giyoto so phmbthowan iran sa AL YAQEEN ! a aya maana niyan kiran na basta a misamapay siran san na miyadakiran so kipapaliyogatan sii ko mga SIMBA KO ALLAH ka miyaka dza so laya iran a YAQEEN na free siran sa sadn a phzowaan iran na knaba kiran iziksa go ipagiza o Allah.

5- So Rasulollah s.a.w. na phndarpa kiran sii ko mga IJTIMA IRAN na so mga SHAIKH IRAN na phkha ilay iran so Rasulollah s.a.w. sa knaba siran totoroga.

Madaklpn a mga salakaw san a mga AQEEDA o mga SOOFISM a datano maaloy ogaid na phithangkaan tano san ka asar ka miyakarayag sii ko Muslim a dii mangdg sa bnar o Antonaa i katantowan angkai a phmbthowan sa SOOFISM ka aniyan kapananggilai so mga LIMPANGAN iran a IPHLIMPANG IRAN SII KO MGA IITO I SABOT KO ISLAM.

Wallahul Muawaffiq.

SO BAE A MAPIYA "SA'LIHA" ( THOTHOL A MAPIYA )

*----♥---------------------------------* heart emoticon *-----------------------------------♥----*

Giyangkai a thothol na pangoyat para sii ko mga Babayakn a Mga Muslimah, Go parapn sii ko mga Pagari akn a mga Muslim a Adn a mga Darodopa iyan go so dapn Makapangaroma.

Phitharo O Rasulollah s.a.w. :

( Aya Iphangaroma sii ko Bae na Pat a Sifat ; So Tamok iyan , So Kapiyaniyan i Itongan , So Kataidiyan , So Agamaniyan , Na Piliangka so Magaagama ka miyazanong ka so kapagontong ) Al Bokhari.

Go Phitharopn O Rasulollah s.a.w. :

( So Doniya na Parahiyasan a Iphakapiya a Giniwa, Na aya pinaka Mapiyaon A Pharahiyan Na so Bae a Mapiya "SA'LIHA" ) Muslim.

---------------
THOTHOL
---------------

Miyapanothol O Isa sii ko mga Ustadh sa Qur-an a Miyaka Oma rakn a tigyan a sakataw a Mayto a Bagowa mama a phakilista ka phamangpd sii ko mga Murit akn a phphangdaon akn sa Qur-an.

Na phitharo aknon, a ba adn a mimomorais ka a mayto sii ko Qur-an ?

Na tigiyan a Oway .

Na tig akn a Batiyaka sa sora a mababa a pd ko Joz Amma' ( Giyanan so isaka Joz sa last a Qur-an ) Na Miyatiyaon skaniyan.

Na tig akn a Bangka Mimomorais so Su'rato Taba'rak ( Su'ratol Mulk ) ?

Na tigiyan a Oway.

Na Miyammsa ako badn sii ko kapaka momoraisiyan sa Mapiya a inangin odi skaniyan na tanto a mayto i ida'd.

Na ini iza aknon so Su'rato Al Nahl obaniyan Murais ?

Na morais iyampn, na kiyaomanan a kaphkhammsa aknon.

Na kiyababayaan akn a izaan akn sii ko mga atasdn a mga Su'rah a Qur-an Na phitharo aknon a Banga Morais so Su'ratol Baqarah ?

Na simbagako niyan sa Oway, Na biyatiya iyan so Su'ratol Baqarah na Dadn a miyaribat ko kiyabatiya iyan!

Na Miyakagiraw ako a Ikaritangko, Bangka Mimomorais so Qur-an ?

Na Tigiyan a Oway.

Na miyakagirawa ako a ; Subha'nallah, Ma'sha'allah, Taba'rakallah.

Na piyangni Aknon a paka onotaniyan rakn si Abiniyan mapita ka Anakn Makilala, sabap sangkoto a tanto ako a miyammsa ko kapiya angkoto a Wata, ka Maytopn na Mimomoraisiyan so Qur-an sa Mapiya.

Na sangkoto a Oras na diyakn dii mapamimikiran o Antonaa i Okit a kiyatadiyamawn i Amaiyan sii ko Mapiya!

Ah Na Tanto a mala a ini kammsa akn kagiya ko Maka Oma si Amaiyan!

Aya sabap na tintangan akn si Amaiyan na daa baon rarad a khailayakn a papata a ba skaniyan tomithitho sii ko Sunnah o Rasulollah s.a.w.!

Na Sangkoto a Masa a kattntngi Akn ki Ama iyan na Mitharo angkoto a Amaiyan, sa tigiyan a ; Katawan akn a phkhammsa ka ko Ama angkai a Wata akn! Na Phaka daan akn rka angkanan a kaphkhammsangka!

Mataan a sii sa thalikhodan angkai a Wata na Ndodon so Bae a Timbang o Sanggibo a Mga Mama!

Phtharoon akn rka a adn a mga Wata akn a tlo kataw a mga Bagowa Mama Na langon siran Maka momorais sa Qur-an! Na so pinaka mayto kiran a 4 pat ragon i Idad a bagowa raga na mimiraysiyan sa mapiya so Joz Amma!!!

Na ayapman a ini kammsa akn na so ina angkoto a wata ! na tigakn a Andamanaya i kiyanggolaolaanan?

Na tigiyan a So Omi iran na andadn i kaphaganad tharo o Wata iyan na diniyandn dii pagphoonan makamoraise sa Qur-an sa tantoniyan siranon a dii pangoyatan.

Diniyan kiran dii tharoon a sadn sa mawna maka morais na skaniyan i makaphamimili o antanaa i inggabitano sangkai a gagawii!!

Go sadn sa mawna makapasad mag revew sa mapiya na skaniyan i makaphamimili o andatano zong amay ko week end!

Na sabap sangkanan Olawla i Omi iran na miya adn sii ko mga wata iyan so kapagoradorad o antaa i phkhaona mga morais ko Qur-an go makapasad mag Revew!

--------------

Ma'sha'allah, Giyanan i Sifat angkoto a Bae a Mapiya, a apiyapn si Darodopa iyan a Datu na knaba tanto maga agama ogaid na skaniyan na tantoniyan a siniyap so mga Mori a tawniyan sa kambiataniyan kiran sii ko Qur-an, sa daiyan siran darainonn go matao sa okit a kaphkhatagoi sa babaya ko mga wataiyan ko kamoraise sa Qur-an go so kaprevew awn.

Sabnar a miyakatoman sombala a mga luks a pimbiatiran so Muriyataw iran sii ko mapiya aya mala na sii ko Qur-an ago Sunna ka Phakaoma skaniyan sii Alongan a Mawri na paka phzangkadn skaniyan o Allah sa Sangkad a phoon sa sindaw a datar o kasigay o Alongan !

Phitharo o Rasulollah s.a.w. :

( Sadn sa Taw a Paganadniyan so Qur-an go nggalbkniyan so madadalmon, na pakanditarn o Allah sombala a Luksiyan sa Alongan a Mawri sa Sangkad a phoon sa sindaw a mas masigay adi so sinar o Alongan, Na go Pakanditarn siran dowa o Allah sa nditarn a bolawan a diron phakatimbang sa kalai arga so Duniya rakhs o dalmiyan! Na matharo iran a dowa a inokami ani makapnditar sa dataraya ? Na matharo kiran a sabap ko kinikakpn o Wataiyo sii ko Qur-an ) Al Ha'kim.

Allahu Akbar, Masha'allah.

Ya Allah Na Baloyangka so Mga Bae rkami a mga Bae a mga Pipiya a mga SA'LIHA a khikasasarigan , na go baloyangka so mga moriyataw ami a sii mazinanad sii ko kitab ka a Qur-an, na go sii ko Sunnah o Nabi s.a.w.

Allahumma A'meen.

SO KISOSOGOON O ISLAM SII KO KAPLIMPIYO

♥------------*------------♥* heart emoticon *♥-------------*------------♥

So Islam na Agama a Soti , na Daa khatarima a galbk siiko Islam Inontabo so Soti !

Na so Kazoti na mas maporo i level adiso kaplimpiyo.

Na so kasotiya sii ko ginawa na dwaka classi :

1- So Kasotiya sii ko Ginawa sii ko di khailay a mga rrzik, datar o kapanakoto, oriyaniyan na so langon o phimbarang a mga paparangayan a di mga pipiya a inisapar o Islam na palayadn anan Marzik a ini sogo o Islam a kasotiyaon go kalompiyo awn phoon sii ko ginawa o Muslim.

2- So Kazoti go so Kaplimpiyo a Mapayag a sii anan phkhakilang ko tlo a mga Shay' :

1. So kasotiya go kalimpiyowa o Muslim sii ko lawasiyan.

2. So kasotiya go kalimpiyowa o Muslim sii ko Nditarniyan.

3- So kasotiya go kalimpiyowa o Muslim sii ko Bilikiyan "Darpa iyan".

> KATAYA SO MGA DALIL SA KISOSOGOON O SLAM KO KAPLIMPIYO :

1- Phitharo o Allah sii ko Rasulollah s.a.w. gowani a isogo iyanon so kindaawaniyan sii ko Islam :

( وثيابك فطهر، والرجز فاهجر ) So'ratol Al Moddathther 3-4.

Maana :

Go so Nditarn ka - Ya Muhammad - Na Sotiyangka go limpiyo angka, go so mga rrzik na bagakn ka go pakawatanangka.

2- Phitharopn Allah :

( إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ ) ٍSo'ratol Baqar 222.

Maana :

Mataan a so Allah na phkhababayaaniyan so mga baratawbat, go phkhababayaaniyan so mga papasang i khasoti go kaplimpiyo.

3- Go phitharopn o Allah :

( وَاللَّهُ يُحِبُّ الْمُطَّهِّرِينَ ) So'rato Al Tawbah 108.

Maana :

Go so Allah Na Phkhababayaaniyan so mga taw a mga barasoti a mga limpiyo.

4- Phitharo o Rasulollah s.a.w. :

( إِنَّ اللهَ تَعَالَى طَيِّبٌ لاَ يَقْبَلُ إِلاَّ طَيِّبَاً ) Muslim.

Maana :

Mataan a so Allah na Soti, Na daa tharimaan iyan inontabo so Soti go limpiyo.

5- Sakataw a mama a phitharo iyan sii ko Rasulollah s.a.w. :

( قَالَ رَجُلٌ : إِنَّ الرَّجُلَ يُحِبُّ أَنْ يَكُونَ ثَوْبُهُ حَسَنًا ، وَنَعْلُهُ حَسَنَةً ، قَالَ : إِنَّ اللَّهَ جَمِيلٌ يُحِبُّ الْجَمَالَ ) Muslim.

Maana :

Phitharo o Sakataw a mama sii ko Rasolollah s.a.w. : Mataan a so Mama na phkhababayaaniyan a so nditarnian na lompiya go mapiya i paras go so tinilasiyan odi na talamopaiyan na mapiya i paras - Na baoto Marata Ya Rasulollah ? Na Tig o Rasulollah s.a.w. a : Mataan a so Allah na Mataid Na Phkhababayaaniyan so Mapiya a iphakataid.

6- Go phitharopn o Rasulollah s.a.w. :

( فإذا أتاك الله مالا فلير أثر نعمة الله عليك وكرامته ) Abu Da'wd.

Maana :

Opama o Bgika o Allah sa Tamok na pakiilain ka so rarad o limo o Allah Siir rka go so Gagawniyan rka. - Asar ka di Mabaloy a katakabor-.

7- Go phitharopn o Rasolollah s.a.w. :

( السواك مطهرة للفم مرضاة للرب ) Al Nasa'i.

Maana :

So Kapaniwak - go so kapamrash sa ngipn - Na Iphkha soti anan na go iphkhalimpiyo o Ngari na go iphkhababaya na go kasosoat o Kadnan.

> Madakl pn so mga Dalil sa Kisosogoon o Islam sii ko kaplimpiyo na go Kashoti na phithangkaan tano san ka aya importanti na miyatanto sii ko phithanggisaan a mataan a so Agamatano A Islam na inipatorayniyan rktano a mga Muslim so kaplimpiyo na go so kazoti.

Na aya puntosan angkanan a Osayan na : Wajib rka a Muslim a kabaloyngka a Limpiyo sii ko Lawas ka go sii ko Nditarn ka go Sii ko Darpa aka, Na go Wa'jib rka a kapakawataningka so mga rrzik sii ko bapiya antonaa i Bontaliyan a marzik.

Nisisita rka a Muslim a Matatanor ka so langowan taman a phzowaan ka na rakhs a kaatasan ka phiyapiya skaniyan ka giyanan i Sifat ka opama ka ska na Thithoka a Muslim.

Mlagid saya so MAMA go so BAE.

Wallahul Muwaffiq.

------------------------