" SABAP A KAMBALASI KO MAPYA A GALBK, NA GO ANTONAA I PINAKAMAPYA KOMGA PHKHAOSAR O MANOSYA "

---------------------------------------- >

Pakaiza i Kim Mayon Abdullah :

ASSALAMO ALAYKOM: Aduna ini ampit rakun a 2 pakaiza:

1) Ino so galubuk a mapiya a da kapniati sa para soa-soat sii ko ALLAH ibarat o so taw na mapikir iyan a phangayam sa KAMBING para negosyo, paka pumbabawata an iyan ka an makadakul nago maphasa nyan. Aya pakaiza na ino mbalasan ta roo o ALLAH?

2) Opama ko so taw na mamola sa kayo (MANGGA/DURIAN) sa aya ni-at iyan na para ko lokus iyan a miyawafat, an pkhioma ko lokus iyan so balas iyan ko dii kanggonai o mga manosiya nago so langona bara niyawa sa giyangkoto a pamomolan. Pakaiza, khapakay oto? JAZAKALLAHU KHAIR!

Kim Mayon Abdullah Muhd Rayyan Hakem...Sumbagangka rakun bo aya khapiyaan. Balasan kawon o ALLAH sa mapiya.

-----

Smbag :

Muhd Rayyan Hakem :

Wa alykom slm w w.

Gyanan a paganay a pakaiza na disan mbalasan.

Kagiya aya paka asal o kakhaoyagan na phphakain, na o kapniati sa mapya na mbalasan o Allah sa Mapya na odi kapniati sa mapya na dimbalasa mapya.

Apyapn mapya angkoto a galbk.

Soman so mga cristian go so mga pd a mga taw na madakl mambo so mga galbk iran a mga pipiya.

Ogaid badn na aya mbidaan tano na apya iran pniati sa mapya so galbk iran na dikiran oto khatarima kagya knaba siran mga muslim.

Sktano pman na opama sii ko mga datar anan a galbk a papakayin o Islam na aya kamblasiron sa mapya na o kapniati sa mapya.

Phitharo o rasolollah s.a.w. :

( إِنَّمَا الأَعْمَالُ بِالنِّيَّاتِ، وَإِنَّمَا لِكُلِّ امْرِئٍ مَا نَوَى ) bokhari.

Maana : Ayaboman a bagian o taw sii ko mga galbkyan na so kiypniatanon, na go ayabo a khaparoli o manosya na sa myapniatanyan sa mapya a galbkyan.

Na so kakhaoyagan sa soti a kaoyagan na o aya niaton na mapya na mapya i balas.

Na o aya niaton na marata na marata i balas.

------

Gyanan a ikadwa a pakaiza na aya mapipikir san na so kapamala o taw sa pamomolan a dii kanggonaan a aya arapyanon na ba kalo kalo na so diiron makanggona sa mapya na so balas o Allah na ibgaynyan siik o luks angkoto a myamolaon.

Na gyanan na pd sii ko mga pipiya a mga galbk.

So kadaklan siiko mga Ulama na aya tindg iran na phkhisampay angkoto a mapya a galbk o wata siiko loksyan.

lagid angkoto a katharo o rasolollah s.a.w. :

( إذا مات الإنسان انقطع عمله إلا من ثلاث صدقة جارية وعلم ينتفع به وولد صالح يدعو له 
) tirmizi, corect a hadith.

Maana : Igira a myawafat so manosya na myapotoldn so mga galbkyan a pkhakanggayron a gona inontabo so tlo :

1- Sadaqa a midadayon so diiron kanggonai.

2- So Ilmo ayan a myakanggay a gona na mitatarosdn so diiron kanggonai.

3- So pangni o Wata iyan a mapya i Amal.

Na so kya aloyron a gyangkanan a Wataiyan a mapya i Amal na syaboton a so mga galbk o Wata a mga pipiya na khisampay sii ko luksyan.

Na go aya Opposite anan sadn mambo sa galbk o Wata marata na khapakay a diiron makambagian so loksyan.

Wallahu A'lam wassala'm.

-----

Kim Mayon Abdullah Muhd Rayyan Hakem,,,balasangkawon o ALLAH samadakul a mapiya na mambagian ka sii sa donya na sampay sa alongan a maori. So pman so ditadii manggasto ago ditadii ka serbesyowi ko wata ta sabap sa atas tanggongan dun oto o loks a miyatangkud.....ino mbalasan tawon o ALLAH? JAZAKALLAHU KHAIR!

Smbag :

Muhd Rayyan Hakem :

- So dii kanggastowi o mama sii ko darodopa iyan ago so mga wata iyan na nisisitaon oto.

Maana Obligation iyan oto sii dyangka a magaganyan sii ko okit a Hala'l.

A ipagizaon o Allah sa Alongan a Mawri o dinyan mipaginontolan.

----

Sopaman so Inombalasanon antawaa ka di ?

Smbag :

Oway tantoron a malai balas gi gyoto i mas taralbi sii ko langon a mga pamm-gayanyan ko mga taw.

Mga dalil :

Phitharo o rasolollah s.a.w. :

( (( دينار أنفقته في سبيل الله ، ودينار أنفقته في رقبة ، ودينار تصدقت به على مسكين ، ودينار أنفقته على أهلك ، أعظمها أجر الذي أنفقته على أهلك )) رواه مسلم

Maana : So dinar a pinggastongka sa lalan sii ko Allah, go so dinar a pinggastongka sa para inimaradika sa oripn, go so dinar a inzadqangka sa misken, go so dinar a phinggastongka siiko familingka, na aya pinaka taralbi roo i balas na so phinggastongka sii ko familingka.

Ikadwa a dalil :

Phitharo o rasolollah s.a.w. :

( ( أفضل دينار ينفقه الرجل دينار ينفقه على عياله ، ودينار ينفقه على دابته في سبيل الله ، ودينار ينفقه على أصحابه في سبيل الله )) رواه مسلم

Maana : Aya tarlbi a dinar na so diing gastoon o mama na so dinar a diinyan gastoon sii ko familiyanyan, go so dinar a diinyan gastoon para sii ko pangangayamnyan a iphagatin sa battle, go so diinyan gastoon sii ko mga pdyan sii ko Jihad sa lalan sii ko Allah a langon a anan para sii ko Allah.

Ikatlo a dalil :

Phitharo o rasolollah s.a.w. 

( ( وإنك لن تنفق نفقة تبتغي بها وجه الله إلا أجرت بها ، حتى ما تجعل في فيَ امرأتك )) متفق عليه

Maana : Go Mataan a dadan a bangka dii manggasto a gasto a para tontot sii ko balas o Allah inonta na balasangkawn o Allah, taman sii ko phmbalowinka a para sii ko darodopa aka.

----

Gyanan i mga dalil sa tanto a kalai balas o dii kanggastowi sii ko familiya apyapn Obligatory odi na Wa'jib so kanggastowi kiran.

Wassla'm.

" KOKOMAN O KAPANGFAKE SA KARATAS PARA SA GALBK "

Pakaiza e Layok A. Khasarigan :

assalamolaikom... pakaiza.. antonai kokoman o miyamasa ko sa certificate sa recto para anako makasoled ko galebek a daa katawi ko ron? so khakowa ko ron a pirak ino halal raken go so pamilya ko? balasang kano o Allah sa madakel a mapiya.

-------

Smbag :

Muhd Rayyan Hakem ;

Wa alykom slm w w.

Paganyron na mapaka phmbida anan sa kokoman.

So kyapamasanyan sa karatas fake para makanggalbk sa galbk na kapangakal oto ko diinyan galbkan.

Na madudosa roo sa mala a dusa, pdoto sii ko mga kabairol jono'b.

Phitharo o Allah : ( فَاجْتَنِبُوا الرِّجْسَ مِنَ الْأَوْثَانِ وَاجْتَنِبُوا قَوْلَ الزُّورِ ) soratol Hajj 30.

Maana : Pilaknyo na go pakawataninyo so mga rrjik a pd sa mga barahala, na go pananggilainyo na go awatanyo so katharo sa kapangakal.

Na amay ko dnyampn katawan so galbkyan ka na dinyan miphnggolalan so sanganyan ka dinyan katawan na dusapn oto ka malalamyan so company a diinyan galbkan.

Na o magaganyan so galbkyan sa mapya a diinyanon kapakanggalbk na ayabo a dusanyan na gyangkoto a paganay a kyapangakalyan.

Sopman so pantag sii ko phkhasokatyan roo na so sabaad na khapakay a kokomn iran anan sa HARA'M.

Aya mambo a Qaidah na soranga a gyanan a mya aloy.

( إن الخدعة والغس منهي عنه ، والنهي يقتضي الفساد )

Maana : Mataan a so kapangakal na go kapamaltik na isasapar anan, na so isasapar na aya ondasyan na binasa, maana di khapaka, di Hala'l.

Tindg anan o mga Ma'liyya.

Ogaid na so tindg o kadaklan ko Ulamah na khapakay oto maan Hala'l.

( فإنّ فساد العقد في التعاقد لا يستلزم دائما فساد المعقود عليه )

Maana : Mataan a so kabibinasa o dii kaphasada na go so diron kapapakaya, na ba gyotodn i lalayon a kokoman o kyphasadaan sa ba di khapay mambo a dataryan.

Gyanan i tindg o kadaklan ko mga Ima'm

So Abo hanifah so Sha'fee so Ahmad.

Na sii tano maka aayon sa so taw a dinyan katawan so galbk na HARA'M oba phpang fake sa mga karatas.

Na so pman so katawanyan so galbk ka khapakay a myapasadyampn oto a phyor ogaid na daa diplomanyan a phyor na roo na o khaiwasi na mapyadn so di kaphphamaltik o taw.

Na opaman o minibolog na asar ka magaganyan na thawbat sii ko Allah.

Wallahu A'lam.

" KOKOMAN O KANDUA' A JAMA'EH KO KATIBAW "

Pakaiza i Samroding Gao Dica :

Salam aden a pakaiza ame saya ko mga guro ame.badikapakay so kanduwaa sa jamaah ko aden a miyatay ron balasangkano o allah sa mapya ??

----

Smbag :

Muhd Rayyan Hakem ;

Wa alaykom slm w w.

Gyangkanan a pakaiza na aya Marayag a phzabotnon na tomitibaw sii ko torogan a piriparado angkanan a mga taw a phndowaa.

Na o gyanan i pakaiza na di anan khapakay oba siran du'a sa jama'eh.

da a dalil na go da mawarad sii ko mga Ulamah o mga Ahlu sunna oba iran anan pyakay.

So hadiths a katharo o rasolollah s.a.w. a :

( اسْتَغْفِرُوا لأَخِيكُمْ ، وَسَلُوا لَهُ بِالتَّثْبِيتِ ، فَإِنَّهُ الآنَ يُسْأَلُ ) abo da'wd correct a hadiths.

Maana : pangninyodn sa rila so pagarinyo, na pangnikano sa ko Allah sa pakathiknaanyan, ka mataan a Imanto na phagizaan skanyan " o dwa a mga mala'ikat ".

Na sii anan sii ko kapasad o kinilbngnon. a matitimo siran.

Na apya san na dowa a katharo san o mga Ulamah a mga Salaf :

_ Si Shaikh ibn ba'z r.t. na tigyan a khapakay a mamangni so Isa kiran sangkanan a oras na phaminn mambo o mga pd a domadaramba.

Datar o aya marayagpn sii ko katharo iyan na kailangan na knaba siran mimbibitiyarai sa minili siran sa paka phndowaan, ka myan-g iran badn so isa a diin dua' na gyoto a phagaminn iran.

Na basiran phmbibitiyarai daan na dapn oto mapay sangkanan a mala shaikh.

Aya dalil a tigyan na gyangkanan a Hadiths a myaaloy.

_ Sipaman si Shaikh Sa'lih Al-Uthaimen r.t. na tigyan a di khapakay oba siran du'a sa jama'eh ka daanan a dalil a ba anan khapakay.

Gyanan a tigyan a Hadiths a mya aloy na daon maaloy oba phnjama siran na phndua siran.

Aya maana nyan na oman i isa kiran sangkanan a masa na iphamangninyan sa rila na go kapakathikna so pagarinyan sa skanyambo.

Maana oman i isa na phangni.

= Samanan na so sktanoron na apya anda sa dwa anan na palayatanoron maayon. ditano pagongkirn so oman i isa kiran ka palaya mabagr so ijtihadyan.

---

Gyanan pman a paka iza na myasmbagdn sa puro a sabap ko kna oba sii anan ko kobor ka so tomitibaw na aya phangni na daa dalil sa ba anan khapakay.

Sabap roo na Sii tano romaramig sii ko kababaloy anan a di khapakay.

Wallahu A'lam.

" KOKOMAN O KANGGAWIINI SII KO MYATAY "

Pakaiza e Bil LGates Abdul :

PHAKA-ISA Antonaa so kang gawi-i ko tao igira mindod ko limo o Allah,oba haram sa Islam so kang gawi-i o knaba?

-----

Smbag :

Muhd Rayyan Hakem ;

Wa alykm slm w w.

Kataya so pagilain sangkai a pakaiza a pagaritano balasan o Allah sa mapya ko pakaiza iyan ka an phkhaththan so thitho a kokoman o Agamatano a Islam.

-Ino so kanggawii adn a paka asalyan sii ko Islam ?

- Antonaa i mapipikir o diinyan gawiinan so myawafat simba oto antawaa ka di ?

- Opama ka khapakay na antonaa i dalil sa kakhapakaynyan ? na o di khapkay na inobs oto na go antonaa mambo i dalil sa di khapakay ??

----

Smbag :

So kanggawii sii ko kalalayamiron o mga taw sa pilipinas na da a ba anan pakaasal sii ko Islam a banyan kayanggola ola, iphoon ko sii ko masa o Nabi s.a.w. na taman sii ko phmbthowan sa tlo a Qro'n Al-Mufaddalah.

A gyanan i mga masa a mga pipiya sii ko Islam ko kyatharo awn o rasolollah s.a.w. : ( خير كم قرني ثمّ الذين يلونهم ثمّ الذين يلونهم ) bokhari.

Maana : Aya mapya a Masa na so masa akn a tigo rasolollah s.a.w. oryanyan na so talondogon oryanyan na so talondogon.

Na mya pasad a gyangkanan a masa a tlo na dadn a ba mya panothol sii ko mga Ala a mga Ulamah sii sangkanan a masa oba minggola ola sangkai a phmbthowan sa KANGGAWII.

Samawto na marayag a daa paka asal o KANGGAWIINI sii ko myawafat.

_ Sopman so Antonaa i ikhidia ko myawaafat a muslim a kabnaryan a minggolalanon ? 

= Na aya smba anan na ipnggolalanon so phmbthowan sa TAZHEEJOL MAYYT a 4 pat timan :

1- prigoon sa mapya.

2- khapann sa mapya.

3- Zambayangan.

4- Ikhobor sa mapya.

Na oryan anan na BA ADN A BAYADANYAN NA WAJIB A KABAYADAN. then Ba adn a inithanan iyan na kailangan a mitoman.

Oryan anan na myapasad so kabnar o Myawafat a Muslim.

_ Gyanan pman a KAPMIATAY na mya aloy tano a daa paka asalyan sii ko Islam.

Aya Mataan a bnar na Siinan Myakowa a adat sii ko Mga Cristian, a igira a adn a myatay kiran na diiran gawiinan.

Na so Nabi s.a.w. na Inisaparyan ko mga Ummatyan oba iran phzonggiringi so mga ridoay iran a masosopakyan so Islam :

( من تشبّه بقوم فهو منهم ) Abo da'wd.

Maana : Sa Taw a pananayanyan so mga pagtaw na pd kiran.

-----------

Opaman oba aya mapipikir o DIING GAWII NA KAZADKA OTO na so kazadqa na Iba'dah SIMBA na so simba na WAJIB A MISONGKAD KO INIKIDIAWN O RASOLOLLAH S.A.W.

Sabap san na o gyanan i Niaton o dii ron Golaola na myaka sold sii ko Phmbthowan sa BID'AH.

Kagya simba oto a myambago a knaba di khagaga nggola ola o rasolollah a goso mga Sahabah ka daa bakiran makaarn sa kazowaawn ogaid na dairan sowaa na nanao sa gyanan na BID'AH a myambago sii ko Islam.

Na aya katharo o rasolollah s.a.w. :

( من عمل عملا ليس عليه أمرنا فهو ردّ ) bokhari.

Maana : Sadn sa taw a galbk sa galbk a simba a daa ba amiron sogoan na sabnar a phakandodon. ( maana ; diron khatarima ).

Aya mataan na barondn myadusa, daron balasi! 

- Antonai sabap ???

Na kagya a so kambabagowi sii ko Islam sa diron pd na dowa dowa a maana nyan :

1- So rasolollah na tiraidoryan so mga Ummatyan ka adn a mapya a Okit sii ko kapmiyatay na danyan kiran pakarayaga.

Na tanto anan a piligro ka miniropanyan so rasolollah s.a.w. sa tridor na ay taman a kala anan a dusa sii ko Allah.

Phitharo o rasolollah s.a.w. :

( إِنَّهُ لَمْ يَكُنْ نَبِىٌّ قَبْلِى إِلاَّ كَانَ حَقًّا عَلَيْهِ أَنْ يَدُلَّ أُمَّتَهُ عَلَى خَيْرِ مَا يَعْلَمُهُ لَهُمْ وَيُنْذِرَهُمْ شَرَّ مَا يَعْلَمُهُ لَهُمْ ) bokhari.

Maana : Mataan a daa mya adn a nabi ko onaan akn inonta na kabnar kiran so kanggonanaowanyan sii ko mga pagtawnyan sii ko katawanyan a Mapya kiran, na go kapaki iktiyarinyan kiran sii ko phoon ko katawanyan a marata kiran. ( na da a datar o nabi s.a.w. na malai awida akal sii ko kapyaan o mga Ummatyan ).

Na ay gda akasan ino mgaday mithridor so nabi s.a.w. ??

2- So rasolollah na danyan macompleto so Islam ka adn a okit a KANGGAWII A MAPYA na danyan maosay na go danyan minggolalan go danyan misogo a knabanyan pman di khagaga .

Na isapaman anan ka Mala a tanto a Dusa kagya katharo o Allah na :

(الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي ) soratol ma'idah 3.

Maana : Imanto a gawii na kyompleto akn rkano so Agamanyo na go tyarotop akn rkano so limo akn.

Sii anan sii ko mori poro Hajj o Nabi s.a.w. na ron initoron sii sa Arafa na oryan o 88 days na khawafat so Nabi s.a.w.

Na ay gda aka a aya kapipikirangkawn na so kanggawii na pd sii ko islam na daon mikomleto ko masa o Nabi s.a.w. di ayadn a myapaka pamokhag ka na so Allah a go so Rasolollah s.a.w.

Na ay kala pman anan a dusa sii ko Allah ??

-----

Samanan na marayag a tanto a so kanggawii a phlmbaan so torogan na phphaganaan so mga taw na 3 days 7 days.

Playa anan di khapakay sii ko Islam a makarorompak sa mga dalil ogaid na so madodonya sii ko sabaad ko mga Ulamah na phndimpisaan irampn so ribat sabap ko kaoonotiron o baya a ginawa.

Odi na kaito a knal sii ko Islam, na phphakadadag sa madakl a taw, na so Allah i matao kiran.

-----

Madakl so mga Undas a di mga pipiya o KAPMYATAY ogaid na ditanodn osayn ka aya importanti na myaka rayag so kokoman O Agamatano na sii rkano anan myaromag a bayabaya .

Ayanyo khowan so Rk o Islam antawaa ka so miniganat rka o mga Luks ka a kanggawii ??

tanodan a so muslim na aya thitho a WAJIBON na maka phantag so kabaya o Allah ago so kabaya o salakawron na ayanyan phanalogphaan na so kabayaon o kadnanyan a rabbol A'lameen.

Wassala'm.

" KOKOMAN O KAKAN A GO SO KAZOKAT SA KAOYAGAN "

Pakaiza i Almer Macabago Sharief :

ASSALAMUALAIKOM WARAHMATULLAHI WABARATUH...
adn a pakaiza ami ko mga pagari ami sii..

1..tonaa so kakan wajeb anan..
2..so oyagan sa ginawa wajeb anan..???

-----

Smbag :

Muhd Rayyan Hakem ;

Wa alykom slm w w.

So Gyangkanan a pakaiza na kailangan sa osayan.

So kaphkhan o manosya na Aya paka asal a kokomanyan na PAPAKAIN knaba WAJIB. 

Gyanan i tindg o langowan o mga Ulamah.

So mga Ayat sii sa Qur'an a matatagoon so kisosogoon sii ko KAKAN go KAINOM na LIL-IBA'HAH maana papakain a paka asalyan.

Lagid o katharo o Allah :

( يا أيها الذين آمنوا كلوا من طيبات ما رزقناكم ) Muslim.

Maana : Hay skano a myamaratiyaya na kangkano na sii ko mga soti sii mga rizkhi ami rkano.

Sii sangkanan a sogoan na so pantagon sii ko kakan na LIL-IBA'HAH papakain.

Ogaid na ikadowa a matatago san a sogoan na so kabaloy o khn o Muslim a HALA'L knaba HARA'M.

Aya kapantg o katharo na o kanka na asar ka soti na knaba rka oto paliyogat na go knaba rka mambo hara'm.

Ogaid na adn a masa a kaphkhabaloynyan a paliyogat, odi na Sunna odi na Hara'm :

- Igira a odi ka kan na khapakay a mawafat ka na roo na mimbaloy a paliyogat rka so kakan kagiya, isa a katitimblan sii ko mga sogoan o Islam na so kasiyap o ginawa sa diron kabinasai.

Phmbthowan sa MAQA'SID A : ( حفظ النفس ) a ikadwa anan sii ko mga DARO'RIYA'T A LIMA.

Na inokaoto khan kagya an malinding so ginawa phoon sii ko kabinasaan.

Samawto na mimbaloy a wajab sabap sii ko siyap ko ginawa, kna oba sabap ko aya paka asal o kakan na WAJIB.

- Igira na diimbaloy a Sunnah Odi na pd sii ko mga simba sii ko Allah.

Sii anan ko igira a aya niaton o Muslim na an makababagr na an mapya a diinyan kikhoatn sii ko mga simba sii ko Allah.

Na sii sangkanan a masa na pd skanyan sii ko mga simba sii ko Allah.

- Igira na Aya pmaloy a kokomanyan na HARA'M gyanan igira a ino komiyan so taw ka an makabagr so lawasyan na anyan minggolalan so phnggalbknyan a hara'm.

- khapakaypn a mbaloya MAKROH gyanan igira a phlayawananyan so diyangka a phkhakanyan, odi na aya niatyanon sa kakhanyan na phnggalbk sa MAKROH.

Gyanan a 2-3-4 na moonot sii ko QAIDA FIQHIYA A :

( الوسائل تأخذ حكم المقاصد )

Maana : So Okit na phkhikokomon so komaman o Antap.

------

_ Gyanan a ikadwa a dataryan a kailangan amambo sa Osayan a maliwanag.

So paka asal O kazokat na knaba paliyogat a odi ka Zokat na iziksa rka o Allah.

Gyanan i paka asal a kokomanyan.

Ogaid na pkhabaloy skanyan a WAJIB sabap sangkai a phanga aaloy :

1- Igira a so taw na familyah na Wajibon so kapakakan o familinyan ka atas tanggonganyan o oto, na roo na WAJIB rkanyan so KAZOKAT sa miyonot oto sii ko KAWAWAJIB o diinyan kanggastowi sii ko FAMILINYAN.

2- Igira a odi maka sokat sa kakhakanyan na khawafat sknayan na WAJIBPMAN OTO sii rkanyan sa myonot so kokomanyan ko KAWAWAJIB O KASIYAP O GINAWA phoon siiko kabinasaan.

- Opaman o Aya niatyanon sa kaphzokatyan na para di massndod sii ko mga simba ko Allah igira a zimbaanyan so Allah kagya adn a kaoyaganyan odi na aniyan miphphangapdi so khikaririmpisan a mga tonganaynyan odi na so salakaw kiran na roo na mimbaloy a SIMBA so diinyan kazokat sabap ko niatyan a mapya.

- Opman o aya pikiryanon na para misosogot sii ko galbkyan a mga rarata na mimbaloy so diinyan kazokat a HARA'M.

--------
Note :

so Islam na ayabo a papakainyan a kazokat na so phphka poon sa HALA'L. madakl so mga dalil saya na ditanodn alowin ka an tanto di phkhatas.

Na so phoon sa HARA'M na odi lakay thawbat so khirkon sii ko okit a kathawbat sa tamok a HARA'M na iziksaon oto o Allah na go diron oto thatas sa ginawanyan na go siiko familinyan.

Makasasayan oto sa gasolina a kkdkiran a apoy a ophon khilati na khirampatyampn so misasaogon a diron pd.

Wassala'm.